Jacob van Maerlant

Jacob Van Maerlant (ca. 1230-1293) wos nen Vloamschn schrivver die schreef inde volkstoale. Ie it zuk en kart miljoen verz’n vant Lattin na tDiets vertoald.

Leevn

Jacob van Maerlant wos ergens rond 1230 geboorn inde streke van Brugge en em weunde in Damme, in dien tid de vôorhoavn van Brugge. Da woarn ton vree rikke steed’n woarda ter vele an handel werd gedoan. Je studeerde ande Sint-Donoaskapitelskole en hoalde z’n bronn’n ut d’abdien Ter Duinen en Ter Doest.

In 1260 estem na na Zêeland vo der in plekske Maerlant (bie den Briel) koster te komm’n. Doar begoest ie te schrivvn voorol ridderromans vo rikke zêeuwsche adelikk’n. je schreef er Alexanders Geesten, nen boek over tleevn van Alexander de Grote, De Historie van den Grale / Merlijns boec, over keuning Artur, en wok de Istory van Troyen, over den trojaanschn oorlog ende zwerftocht’n van Aeneas.

Rond 1270 kêerde em were na Damme en dor schreef em zin bekendste werk’n:

• Der naturen bloeme (1270); e verzoamelinge van 13 boek’n over plant’n, diern en andere miensnrassn. Als bron gebrukte em iervo 'De natura rerum' van Thomas van Cantimpré.

• Den Rijmbijbel (1271); e vertellinge vande bijbelsche geschiedenisse. De geestelikk’n woarn der int begun teegn omda et inde volkstoale geschreevn wos en da ezo iederêen den bijbel koest leezn.

• De Spieghel historiael (1285); z’n grôotste werk woarin da de hille geschiedenisse tot an den êerstn krustocht verteld werd.

Jes verzekers gestorvn in 1293 in Damm mo na z’n dôod kend’n z’n werk’n e herupleevinge in 19de eeuw bist de Vlamsche beweginge en in 1997 in onzoekers gezeid da Van neghen den besten, de beschrivvinge van 9 held’n ut de geschiedenisse, wok van den and van Jacob van Maerlant zin. Da zo ton zin latste wirk moen gewist zin want Van neghen den besten es geschreevn ahter 1291. Mo over da werk zin ze nognie hil zeker.