De Canadien

Van Wikipedia
(deureverweezn van The Brooding Soldier)
De Canadien

De Canadien (Iengels: Saint Julien Memorial of The Brooding Soldier) is e Canadees oorlogsmonument by Sint-Juliens (Langemark). 't Stoat ip 't kruuspunt van de Brugseweg en de Zunnebeekestroate (Vancouver Corner) in e park me roozn en conifeern. 't Monument is ipgedreegn an de meêr of 2000 Canadeesche militairn die an under ende kwoamn by den eêste goazeanval binst de Twidde Slag om Yper in den Eêste Weireldoorloge.

't Beeld stoat ip e vierkant plateau met an weerskantn e boogvormign uutsproeng. 't Is e piloare van 10 meter hooge, me van boovn de buste van e Canadeesche soldoat die lik an 't peizn is over 't lot van zyn gesneuvelde moatn. Je stoat me geboogn kop, gericht noa de plekke vanwoa dat den 22stn april 1915 de chloorgoaze kwam angedreevn. Zyn handn rustn ip en ommegekeêrd geweir, kolve noa boovn. Die hoedienge 'Arms reversed' is de traditioneele militaire groêt an de gesneuveldn. Van voôrn ip de piloare stoat in groôte letters 'CANADA'.

An de zykantn van de piloare zijn paneêln angebrocht met ipschriftn in 't Iengels en 't Frans die e korte soamnvattienge zyn van de Canadeesche bydroage binst de twidde slag om Yper. An de voêt van de piloare, langst de rechterkant, stoat de noame van den oentwerper en 't joartal: F.C. Clemeshaw 1921. In e booge roend de piloare zyn ip 't plateau de volgnde oriëntoasjepyln angebrocht : Ypres, Boesinghe, Hooghe, Zonnebeke, Passchendaele, Poelcapelle en Langemarck. Da zyn de plekkn met e speciale beteêkenisse vo de slag.

Achter 't monument stoat e kastje me 't bezoekersregister.

't Monument is ing'huldigd gewist den 8ste juli 1923 ten elvn ip e zundag. Den hertog van Connaught (broere van de Britse keunienk) en Prins Leopold van België woarn ip de plechtigheid.

De Canadien kwam in 2009 e beschermd monument.

Externe koppeliengn[bewerkn | brontekst bewerken]

Wikimedia Commons