Tolhuus (Brugge)
’t Tolhuus van Brugge uut 1477 is 't grôot gebouw met de puntgevel in nateurstêen an de Sint-Jansbrugge, nu de Jan Van Eyckplatse genoemd. ’t Stoat an den overkant van de Poortersloge, tusschn d’Academiestroate en ’t Genthof.
In de 13e eêuwe kreêgn d'heern van Gistel 't tolrecht in leên van de groaf van Vloandern. 't Was e deurvoerrecht die betoald most wordn deur de schippers die Brugge binn kwoamn langs de Langereie en de Spegelreie, een belastienge ip de goedern. 't Bedrag wierd bepoald deur 't gewicht van d'ingevoerde produuctn en doarom wast er ook e weeghuus. Van doa voardn de boôtn voôrt langs de Kroanreie no de Woaterolle ip de markt.
Deur huwelik was ‘t geslacht van d’heern van Gistel verboundn mè da van Luxemburg en Vendôme.
‘t Monumentoal portoal, lienks van de gevel, droagt ’t woapn van Pieter van Luxemburg, ridder van d'Orde van et Gulden Vlies en bouwheere van ’t Tolhuus.
’t Smal gotisch geveltje in nateurstêen d’r neffest is ‘t Pyndershuus, 't gildnhuus van de pynders of lastdroagers en stamt uut 1470. In de gevel is ter beeldhouwwerk van pyndertjes die ’t gebouw oundersteunn en boovn de roundbogige pôorte stoan under vier patrôonillign.
Achter de vormienge van ‘t Zwin was Brugge uutgegroeid tout e belangryk West-Europees commercecenter met e grôte noame ols exportcenter van ‘t Vlams loakn.
’t Economisch zwoartepunt die ol e hêel ende gericht gewist was ip landcommerce, verschoof no de plekke round de Spegelreie en was nu mêer gericht ip maritieme commerce.
Externe koppelienge
[bewerkn | brontekst bewerken]
|
Ofbeeldiengn die ier by passn ku je vien in de categorie Old toll house (Bruges) van Wikimedia Commons. |