Trekteur

Nen trekteur of tracteur is een voertuug geconstrueerd vo 't werk in de landbouw te verlichtn. Mêestal trekt den trekteur een andre macine vôort die nôdig is in 't werk of e (load)karre.

Verre oltyd zyn d'achterwieln grôder dan de vôorwieln. Doadeure kant 'n nie (makkelik) vaste lôopn ip 't veld. Sommigte tracteurs èin zelfs doubele bandn an, das vô nog mêer grip, ze gebruukn da mêer in Amerika dan oalier.

Vanof da je 16 joar zyt kuj je probeern een G-rybewys t' oaln wa da je nôdig èit vo mè ne tracteur meugn te ryen (tot 20 ton). De mensn geboorn vô oktober 1982 èin gin rybewys nôdig.

Trekteurs èin ôok vé mêer vetissn/vitessn dan nen otto omda ze moetn vé verschillende sneleedn exact anoudn en ôok vo vé macht t'èin. By oude trekteurs met e bêtje slete ip kun je wel kê mezérie èin voor in de zjuste vitesse te roakn dus èin de constructeurs nu veranderd dan de trekteurs nu twêe versnellingspookn èin of dat et digitoal werkt in plekke dan vroeger mè êen versnellingspoke e stik of acht vetessn.

Ip trekteurs steekn ze ôok soms vorkn zoda ze em kunn gebruukn as clark of schepn vo bulldozer of kroane. Trekteurs weirdn ôok mêer en mêer gebruukt in transportbedryvn ter vervangienge van camiongs omda ze ôok grôte loadiengn kunn vervoern en 't minder kost vo te verzekern en der gin controlle ip is da j' om de zôvé eurn moe rustn lik by camiongs.

Geschiedenisse

Ip 't ende van de joarn 1800 zyn z' uutgevondn omdat er ton mêer eetn nodig was deur d' Industriële revolutie en doardeur er ôok nog kê minder mensn beschikboar woarn vo te werkn in de landbouw, dus moest et werk lichter en rapper zyn of kunn goan gedoan weirdn. D'êeste werkten ip stôom moa ol zêre schoakeldn z'over ip verbrandiengsmoteurs. In Europa oltyd diesel, in Amerika gebruukn ze liever nafte. Den trekteur pakt verre over hêel de weireld de rolle over van trekbêestn.

Veiligheid

Olle moderne trekteurs zyn nu ôok vôorzien met e veiligheidskôoie zoda aje zoe ommekêern, nie ondern trekteur kunt gesmeierd weirdn. In zukke veiligheidscabine kunn ze ton ôok mêer luxe steekn nateurlik lik radio's en zetels me stoffe ip of zelfs lêer.

Bekende merkn van trekteurs

Fendt
Massey-Ferguson
Mercedes, makt ôok (ip klêne schoale) trekteurs
New Holland
Renault, produceerde ôok lange trekteurs mo z'èin under linne verkocht an Claeys da oal êder gespecialiseerd was in landbouwmachienn lik pikdèssers.

Ofbeeldiengn die ier by passn ku je vien in de categorie Tractors van Wikimedia Commons.