Zweeds

██ Plekkn woar da Zweeds d' officiële toale is, gesprookn deur de mêerderheid van de bevolkinge (Zweedn, Åland, West-Finland)██ Plekke woar da Zweeds d' officiële toale is, gesprookn deur e minderheid van de bevolkinge (Finland)

Zweeds (svenska) is e Nôord-Germoansche of Scandinoavische toale met oengeveer 13,2 miljoen sprekers. 't Is de mêest gesprookn toale in Zweedn (10 miljoen sprekers) en êen van d' officiële toaln van Finland (300.000 sprekers). In de Finsche autonome provinsje Åland is Zweeds d' ênigste officiële toale.

Zweeds is nauwe verwant an d' andere twêe ip 't vasteland gesprookn Scandinoavische toaln, Deens en Noors. 't Wordt geschreevn mè 't Latyns alfabet, woaran dan der drie letters toegevoegd zyn: Åå, Ää, Öö. Kenmerknd vo 't Zweeds is da 't e tôontoale is. Der bestoan twêe verschillige tôonaccentn. Veranderingn in tôonhoogte by 't uutspreekn van êen en dezelfste lettergrepe, kan de betêkenisse van 't woord verandern.

Zweeds is, juste lyk d' andere Scandinoavische toaln, 'n ofstammelinge van 't Oudnoors, de gemêenschappelyke toale van de Germoansche volkern die binst de Vikingtyd in Scandinoavië leefdegn.

Zie de Zweedse uutgoave van Wikipedia.