Egied Strubbe
Uit Wikipedia
Egied Strubbe (°Brugge, 23 november 1897 - +Brugge, 7 november 1970) was ne prof geschienisse an den univ in Gent.
[bewerkn] Afkomste en studies
Egied was de zeune van Joseph Strubbe, nen importeur van out die gemeenteraadslid was in Brugge (1878-1895), provincieraadslid (1890-1894) en volksvertegenwoordiger (1908-1912). Egied dei zyn studies in 't Sint-Lodewykscollege in Brugge en 't Sint-Jozefscollege in Turnoet. Ie studeerde rechtn an de Katholiekn Universiteit van Leuven, wo dat em promoveerde toe doctor in de rechten in 1921.
[bewerkn] Carriere
Toe by 't begun van de Twidden Wêreldoorlog bleeft em advokaat an de balie in Brugge. Intussn was zyn interesse voe rechtsgeschienisse ipgewekt deur een antal Brugse historici lik Camiel Callewaert en Henri de Sagher. Van 1922 voort toe an zyn dood was em medewerker by de Société d'Emulation de Bruges. Vanaf 1931 gaf em an den univ in Gent de vrye cursus geschienisse van 't oud-vaderlans recht. In 1935 wier em deeltyds benaamd voe Algemene Rechtsgeschienisse. Vanaf 1938 gaf em Paleografie van de Middeleeuwn, en vanaf 1940 Oorkondenleer van de Middeleeuwn.
Vele jaren was em verantwoordelik tope met Ganshof en Van Werveke voe d'ipleidinge van de mediëvisten in Gent. Ie gink in 1967 ip pensioen.
Buten den univ was em één van de promotoren van 't Groeningemuseum in Brugge, een museum rond schilderkunste in Brugge. Ie was ook promotor van 't Museum van Schone Kunsten van Latem en de Leiestreke in 1928.
Ie was betrokken by vele wetenschappelikke uutgaven. Azo was ie bevoorbeeld grondlegger van de Belgisch-Nederlanse topewerkinge voe d'uutgave van de teksten van de Grote Raad van Mechelen in 1966/1971, d'uutgave van de twaalfde-eeuwse encyclopedie, 't Liber Floridus in 1968, patroneerdet em de studie van de Middeleeuwsen univ van Orléans en zat em sins 1950 in de redactie van 't internationale "Tijdschrift voor Rechtsgeschiedenis".
Sins 1932 was em lid van de 'Keuninklikke Commissie voe d'Uutgave van Oude Wetten en Verordeningn van België', sins 1955 was em lid van de 'Keuninklike Commissie voe Geschienisse' en in 1946 was em al lid geworn van de 'Keuninklikke Vlamse Academie voe de Wetenschappen, Lettern, en Schone Kunsten van België' en de 'Keuninklike Commissie voe Volkskunde'.
In 1968 kreeg em nog een doctoraat honoris causa in Leidn.
[bewerkn] Meer info
STRUBBE, EGIED, De luister van ons oude recht. Verzamelde rechtshistorische studies, Faculteit der Rechtsgeschiedenis Rijksuniversiteit Gent, Uitgeverij Elsevier-Sequoia, Brussel, 1973.
