Pieter de Coninck

Van Wikipedia
Dit artikel es geschreevn in 't Brugs, en da zou best ozô bluuvn.

Pieter de ConinckBrugge tussen 1250 en 1260, † in 1332 of '33) wos n Vlams volksleider.

Standbild van Breydel en de Coninck ip de Mart van Brugge

De Coninck stamdege uut 'n hêel geweune weversfamilie, mo je koste wree goed klappn en koste zyn publiek zodoanig overtugen dazze em overal zou'n gevolgd hen.

In 1301 is 't ie vo den êeste ki vermeld als leider van een ipstand tegen belasting'n van 't stad Brugge. In juni van da joar vliegt ie in 't gevang, mo 't volk komt em bevry'n. De Lieboards pakken 't bestier van 't stad over. Mo Jacques de Châtillon, de landvoogd, trekt Brugge binnen en Pieter de Coninck word verbann'n.

Ip vrage van Jan en Gwijde van Namen, zeuns van Gwyde van Dampierre (groaf van Vloandern), keert de Coninck in december 1301 were no Brugge. D'er volgt 'n ipstand woarby dan ze den 1e mei van 1302 de kastêlen van Male en Sysêle verôovrn. Mo de Lelioarts van de Châtillon kommen met e leger van 800 man en de Coninck is were weggejaagd.

Achter de Brugse Mettn komt Pieter were no Brugge vo t'elpen met Willem van Gulik (klêezeune van Gwyde van Dampierre) by de leidinge van 't stad. Ze maken 'n Vlams leger da surtou uut geweune menschen, boeren, ambachtslied'n bestoat. 't Stad Brugge betoalt 't grotste dêel van de kosten vo den ipstand. Ze bevryd'n de kastêlen van Male en Wyndoale en e grôot stik van de reste van Vloandern. Mo Kassel en surtou Kortryk bluuv'n in Fransche anden.

't Vlams leger trekt no Kortryk vo te proberen Kortryk te verôovrn. Da gebeurt dus in de Guldenspôrenslag van den 11e juli 1302. Korts vo 't begun van die slag is Pieter de Coninck me twi van z'n zeuns ridder geslegen.

In 1309 stoat ie tegoare met Jan Breydel en Jan Heem an 't oofd van n ipstand tegen de goekeuringe van 't Verdrag van Athis-sur-Orge.

Standbild[bewerkn | brontekst bewerken]

Ip de mart van Brugge stoat er sedert 1887 n standbild van Pieter de Coninck en Jan Breydel. Ip de voaravond van den 11e juli word'n d'er nog oltyd blommen geleid deur 't stad.