't Zoute

Van Wikipedia
't Zoute is no. V ip de koarte van Knokke-Heist

't Zoute is een dêel van de kustgemêente Knokke-Heist in West-Vloandern. 't Ligt moar e poar km van de Belgisch-Hollandsche grenze.

't Zoute is e ryke wyk woa dat er gin gemêentebelastingn betoald wordn en woa dat er vele luxeboutiques zyn en restaurangs. 't Zoute is gekend vo z'n snobisme. Burgemêester Leopold Lippens het in de joarn 1980 dudelik gemakt dat 'n liever nie het dat er frigoboxtoeristn ofzakkn noa zyn stad. En 't Albertpling wordt deur de toeristn ironisch place m'as-tu-vu genoemd omdat de snobs doa geirn gezien wordn.

Geschiedenisse[bewerkn | brontekst bewerken]

De geschiedenisse van 't Zoute is nauwe verboundn met de Compagnie 't Zoute. Die compagnie is ip 1 meie 1908 gesticht deur de familie Lippens. Verschillige leedn van de familie woarn iprichters. De doagelikse leidinge is nu in handn van twêe kozyns: Raymond en Maurice Lippens. De noame van de ounderneminge verwyst noa de schorrn: "zoute schorre".

De bedoelinge van de Compagnie 't Zoute was an den êne kant de versnipperinge van eigndommn van de familie te vôorkommn en an den andere kant de bescherminge van 't uniek landschap van Knokke.

Ip 't ende van de negentienste êeuwe kwoamn d'r vele Ingelsche toeristn noar uze kuststreken vo te genietn van de gezounde zêelucht. Ze brochtn hunder nationoale sportn mee lik tennis en golf. Ook ist er nog assan een Anglicoans kerksje in Knokke an de Zouteloane. De familie Lippens werkte mee an den anleg van de Royal Golf 't Zoute, één van d'oudste en schonste golfterrings van 't Europees continent en de tennisveldn van de Tennisclub in 't Zoute. En loater volgde ook 't anleggen van verkoavelingen. 't Zoute is deur de Duutsche urbanist Stübben ountworpn en droagt by tout 't exclusief karakter van Knokke-Heist. Round 't golfpling zyn der in den êestn elft van de twintigste êeuwe e grôot dêel villa's en cottages gebouwd volgens stringe stedenbouwkundige vôorschriftn.

Den dag van vandoage is de Compagnie 't Zoute eigenoare van landbouwgroundn, de Royal Zoute Golf Club, de Vlindertuin, de Royal Zoute Tennisclub, de minigolf, zestien fermettes die verheurd wordn en ze zyn ook nog eigenoare van 't Zwin.

Beziensweirdigheedn[bewerkn | brontekst bewerken]

Kykt noa Bouwkundig erfgoed in Knokke-'t Zoute
Wikimedia Commons

Externe koppeliengn[bewerkn | brontekst bewerken]