6de SS-Stormbrigade Langemarck

Van Wikipedia
Ga naar: Begunplekkn, zoeken
Symbool 27ste SS-Vrywilligers-Grenadier-Divisie Langemarck

De 6de SS-Stormbrigade Langemarck was een ounderdèèl van de Duutse strydkrachtn an 't Oôst-frount binst de Twèède Wereldorloge dat oofdzaaklik deur Vlamingen gevormd wier.

De ôorsproung van de name[bewerkn | brontekst bewerken]

De name Langemarck was gekoozn op basis van den eldhaftigen klank die de name van et West-Vlamse platstje gekregen aad deur de gevechtn die de Duutsers der binst den Èèste Wèreldorloge geleverd aan. D'r werd verteld da de Duutsche troepn doar anvieln ounder 't ziengn van 't Duutsch volkslied. Dat is loater ni juste gebleekn, moa 't wos ollszins 't begun van de Langemarck-mythe.

Vo de Duutsers moest de name Langemarck stoan vo de vrienschap tussen under volk en de Vlamingen. De Vlamingen verstounden dat eigenlik nie goed worom dan de Duutsers under brigade noemden nor een platse wadan de Duutse in den Eèste Wèreldorloge verloorn an, bist dan de Wollen by de '5de SS-Freiwilligen Sturmbrigade Wallonien' mochten goan.


Geschiedenisse[bewerkn | brontekst bewerken]

In septembr 1941 werd er deur de Duutsers een Vlams legioen ipgericht ounder de name Freiwilligen Legion Flandern. Olleman tussn de 17 en de 40 joar kost inschryvn. In november vertrokken ze ols ounderdèèl van de 2de SS-gemottoriseerde infanteriebrigade no 't Oôst-frount by Leningrad, wo dan z' ol drikt in de streke van Volkov in 't gevecht gesmeetn werden vo d' anvollen van de Rûssen te stoppen en wo dan z'ol drikt under capaciteiten mosten bewyzen. Achter zes moandn in de frountlinie te vechten, me vele verliezn werdn ze afgelost, mo in ogustus 1942 moestn z'ol were der notoe vo de anvollen van de Rûssen die Leningrad wilden ountzetten af te sloan.

In meie 1943 kregen z'under nieuwe name van SS-Freiwilligen Sturmbrigade Langemarck. In oktober 1943 werden ze angevuld me nieuwe Vlamse en Finse vrywilligers en werden ze de 6de SS-Stormbrigade Langemarck, oungevèr 2200 man sterk. Den dag achter Kestdag werden ze no 't frount in Oekraine gesteurd wo dan ze by Kiev en Zhitomir vochten neffest de 2de SS Panzer Division Das Reich. In januori 1944 werden ze zelfs deur de Russen omsyngeld, mo kosten ze under, ten koste van veel doo'n en verlies van materiol der were uut vechten.

Duutsche misleidienge[bewerkn | brontekst bewerken]

Vele Vlamsche soldoatn die meedeen me de Duutsche, en dus ôok de die van de Stormbrigade Langemarck, woarn verteld da ze streedn voe de Vlamsche zoake en teegn et goddeloze bolsevisme. Ze woarn ôok beloofd da nunder oversten Vloamiegn giengn zyn, of tenminste Vlams kostn klappn. Moa ze kwaamn bedroogn uut. In totoal zoen der oungevèr 10.000 Vlamse vrywilligers by 't Vlams Legioen en de Waffen SS gezeetn en. Dovan zoen der oungevèr 2.000 vermist of gedood zyn. Vele Vlamse Oostfrountsoldoatn en achter den orloge in erbarmelikke condisies in Russische kampen gezeten. In 1955 werd er een groate groep vrygeloatn en zelfs nog de 12ste meie 1962 wern der nog vier Vlamse Oostfrounters achter 18 joar Ruussische gevangnschap vrygeloatn.