Aa (Vrankryk)

Van Wikipedia
(deureverweezn van Aa)
Naar navigatie springen Naar zoeken springen
Liggienge van d'n Aa
Den Aa in Merck-Saint-Liévin

Den Aa is e riviere in 't nôordn van Vrankryk van 89 kilomèiters lank die ountspriengt in't plateau van Artesië by de plekke Bourthes, deur Sint-Omoars strôomt en uutendelyk uutmoundt in de Nôordzêe by Greveliengn.

Den Aa eit drie karakteristieke dêeln:

  • De boovnlôop (la Haute Aa) tusschn Bourthes en Arkn (40 kilomèiters), met e straf vervol en nie bevoarboar.
  • De middnlôop tusschn Arkn en Woatn (10 kilomèiters) mè vele oude industrie. Round Arkn en Sint-Omoars stopt et ôogteverschil ommettekêe, vandoar da deur 't stilstoande woater em ier 't moeras van Cleremeersch gevormd et. Den Aa komt by Arkn ôok tegoare mè den Nieuwndyk die ezo de verbiendienge makt me de Leie by Ariën.
  • De beneenlôop (la Basse Aa) tusschn Woatn en Greveliengn (30 kilomèiters) die deur e maritieme vlakte strôomt en uutmoundt in de Nôordzêe. Ôorsprounkelyk wos den Aa ier e brêed estuoarium deur 't weynige ôogteverschil en de geteydn van de zêe, mo deur inpolderienge in de middelêeuwn en de loatere kanaliseerienge es de riviere nu rechte en gelykmoatig van brêedte. By Woatn komt ôok d'Ôoge Kolme in d'n Aa uut, e gekanaliseerd'n oud'n zy-arm van d'n Aa. Langs oliere kun je deur teffrente ofwoateriengskanoaln richtienge Bergn en Duunkerke voar'n.

De Aa vormt de grenze tusschn 't Noorderdepartement en 't departement Nauw van Kales. 't Is ook d' historische grenze tusschn de groafschappn Vloandern en Artesië van in de middelêeuwn toet 't ende van 't Ancien Régime.

In verschillige landn van West-Europa bestoan der riviern, beekn of meern met e noame lik Aa, Ae, Ee of Ey, ofkomstig van 't Oud Germoans aha of ahwô, wat da "woater" wil zeggn. 't Is ook verwant an 't Latyn aqua en 't Deens en Zweeds Å.

Wikimedia Commons