Achille Van Acker
- Dit artikel es geschreevn in 't Brugs, en da zou best ozô bluuvn.
Achiel Van Acker (8 april 1898 - 10 juli 1975) was een Bruggelienk die by de grotste polletiekers van achter den Twiddn Weireldôorloge mag geteld worden. Binst z'n grôte carrière in de Belgische pollitiek ei tie vier keren eerste minister gewist:
- 12/02/1945 - 02/08/1945
- 02/08/1945 - 13/03/1946
- 31/03/1946 - 03/08/1946
- 23/04/1954 - 26/06/1958
Up 23 december 1958 ist'ie toet minister va stoat benoemd.
Achiel Van Acker was een echte selfmade mens. An z'n elf joar ei tie moetn stoppn van no 't schole te goan vo tuus te kunnen elp'n by z'n oeders.
Achter da tie eerst gewerkt had in 't socialistisch syndikoot, is tie in 1927 in 't Parlement gerocht vo de BWP, de Belgische Werkliedenpartij, wa da nu SP.a is (Socialistische Partij Anders).
Z'n eerste drie goevernementen een èn nie lange meegegoan deur de Keuniengskwestie met da styf moeilik werekeren van Leopold III. Da was één van de moeilykste momentn vor 't land.
Z'n grotste verdienste was da tie 't sistèm van de Sociale Zekerheid eit ip z'n poaten gezet, wa datter toe vandage vooren gezorgd eit da vil geweune menschen an d'ormoe ontsnapt zien.
J'is ook bekend omdat ie achter den orloge de Belgische koolpitten were in gank ei gestoken. Je was ton (oender andere) minister van Steenkolen.
Achiel klapte Brugs en in ‘t Brugs dialect wordt de Fransche J uutgesprookn lik Z en de CH lik S. (Ze kykn no de mats teegn Sarleroi en goan no de Zeruzalemkerke). Lik veel Bruggeliengn kost ‘n die klankn ook nie uutspreekn ot 'n Frans klapte. Ze voundn da nateurlik styf komiek en ze zeien: 'Assiel parle le bruzois dans les deux langues nationales' en d'r wierdn moppn verteld à la manière d'Assiel. Ot 'n minister van steenkool wierd kreegt 'n z'n lapnoame Assiel Sarbon.
Je was ook lid van de loge (Vriemetseloarie).
Zyn derde zeune Frank Van Acker was volksvertegenwoordiger, senateur, minister en burgemeester van Brugge.