Ad fundum

Van Wikipedia
Naar navigatie springen Naar zoeken springen
E cantus ip e schilderye round 1900 van Georg Mühlberg

Ad fundum is e term die wordt gebruukt by 't zêre ipdrienkn of achteroversloan van alcolischn drank, geweunlik bier. 't Is Latyn vo tout de bodem.

Den term wordt surtout gebruukt in studentemilieus en lik stunt ip fêestn. Een ad fundum is e belangryk ounderdêel van e cantus, e zang-en drankfêeste by de studentn. Vo dat den ad fundum gedrounkn wordt, moet er êest geklounkn wordn ip d'anwezign en da gebeurt mè bepoalde formules lik: Prosit senior, prosit prosenior(es), prosit corona, ad fundum. Achter den ad fundum zyn der die 't glas ommegekêerd boovn hunder hoofd houdn vo te bewyzn da 't leeg is.

Êen van de ceremonies is 't salamandern. Dat is 't klienkn met e bepoalde formule ip de gezoundheid van etwien of etwadde. De salamander wordt ingezet deur de praeses met: Ad exercitium, sanctissimi salamandris, omnes commilitones qui adsunt surgite! De corona (al d' anwezign buutn 't praesidium) stoat ton rechte en antwoordt mè: Surgimus! Doarachter begunt de praeses e monoloog noar eign inspiroasje, woaby dat de corona achter iedere zinne zyn goekeurienge of ofkeurienge lat hôorn. Ip 't ende gift de praeses 't commando vor ad fundum te drienkn.