Apocalyps

Van Wikipedia
Boek der oopnboariengn

Apocalyps is Grieks vor oopnboarienge. 't Is et latste boek van den bybel da geschreevn is deur Johannes die der een antal vizioenen in beschryft over 't ende van de wèèreld en de komst van 't Ryk Gods.

Inoed[bewerkn | brontekst bewerken]

In z'n èèste vizioen ziet Johannes Jezus Christus: Z'n oofd en z'n oar zyn wit lik snèèuwwitte wulle, der komt vier uut z'n ogen en in z'n rechternand eet ie zeevn sterrn. Uut z'n mound komt ter een scherp zwèèrd. Je zegt an Johannes dat ie olles ip moe schryven vor et an de zeven kerkn van Klèèn-Azie over te briengn. Ton ziet ie God zitten ip een trône met in z'n rechternand een boek me zeven zegels woa dan de ge'eime plann vo wa dat ter me de wèèreld go gebeurn instoan. De Lèèuw van Juda, die eigenlik et Lam Gods is, een Lam me zeven oorns en zeven ogen, kut ols ènigsten de zegels verbreekn. Os et lam de zegels begint te verbreekn verschynn de vier ruters die dôod en verderf bringn. Os et vuufde zegel verbrookn wordt verschynn de zielen van de menschen die vermoord zyn omdan ze 't woard van God verkoendigd en. Os et zesde zegel verbrookn wordt, wordt de wèèreld verwoest ols têekn da de grôte dag van Gods woede gekommn is. Tussndeure veschynn der ton ook nog 144.000 dienstknechtn van God die een zegel ip under voroofd gedrukt krygen. Os de zevenste zegel verbrookn wordt verschynn der zeven iengels me bazuunn womee dan ze elk ip toer enorme verschrikkingen afroepen.

Dorachter verschynt er een vrouwe die met de zunne geklèèd is die angevollen wordt deur een grôte, vierrôon drake. Ton gebeurt ter nog vanolles me verschrikkelikke bèèsten die stoan vo de anti-christ, de zeven plagen, d'oere van Babylon en utendelik de stryd tussen de duvels en de legers van den emel. Satan wordt utendelik gevangn vor em achter duusd joar were vry te loaten worachter dat ie ton in een poele van vier en zwoavel gesmeetn wordt wodat ie vor oltyd, dag en nacht gepynigd wordt. In de latste oofdstikken wordt een nieuwen emel, een nieuwe èèrde en een nieuw Zeruzalem beloofd.

Invloed[bewerkn | brontekst bewerken]

Et boek Apocalyps eet oltyd hèèl sterk angesprookn by vele menschen die verwachtigen da 't ende van de tyden olle momente kost gebeuren. Ook in onze tyden zyn der menschen die de vele orlogen zien ols een teken van Apocalyps. De menschen trekkn der under ton ook an ip da achter de verschrikkingen van onzen edendaagsen tyd der een duusd-joarig Ryk komt van vrede, overvloed en geluk. In de symbolische betèkenisse stoat Apocalyps vo doad en vernietigienge, bvb. in de titel van de film van Francis Ford Coppola Apocalypse Now of et spel ip Playstation Apocalypse.