Belgische chocola
 |
 |
 |
 |
Belgische chocola is weirldberoemd, nie ollêne deur zyn pralienn, moar ook deur de kwaliteit van de chocola, en de maniere woarup da 't gemakt wordt.
Fabrikage
[bewerkn | brontekst bewerken]Gelik ieder ander sôorte chocola begint Belgische chocola as cacaobôonn. Achter dan de zoadjies te droogn zyn geleid en ton gebrand wordt de pele weggedoan, en de keuze en de miengelienge van de gepelde zoadjies is den êeste stap da Belgische chocola zoa apart makt van de reste.
Een twidde belangrike stap is 't moaln van de gepelde zoadjies, wadda veel fynder gebeurt dan voar andere sôortn chocola (toe 12 µm, vergeleekn mè 24 µm in Iengeland). Achter 't moaln ejje een chocolalikeur mè 50% vet (cacaobeuter), die ton verwarmd wordt toet 54 - 71 °C, binst dat 't geroerd wordt en lucht d' erin gebloazn tope met emulsiemiddeln.
Belgische chocola hèt ook minder suker in dan Zwitserse chocola, en in 't finoale produkt zit er round de 43% (minimum 35%) cacao in.
Belgische chocola as verkôopsargument
[bewerkn | brontekst bewerken]Deurda Belgische chocola zoan hoge kwaliteit hèt, wordt het in plekkn gelik Iengeland of Amerika as een têekn van kwaliteit voa 't hêle product angezien. Up 't moment da de "Magnum" frisco uutkwaam, zeit de promotie vrê dudelik "with Belgian chocolate", en sedertdien zie je geregeld dan byvôorbêeld koekn woarda de verpakkienge "Belgian chocolate" vermeldt automatisch dierder zyn dan de zelste koekn zoender de chocola.
't Is doavan dan d' er nu wettn zyn uutgebrocht die verbien van chocola "Belgian chocolate" te noemn tenzy da 't echt in België is gemakt. Dus kryg je nu beschryviengn gelik "made from Belgian chocolate" (ot ievers anders hersmoltn is van chocola die in België gemakt is) of "Belgian-style chocolate"
Pralienn
[bewerkn | brontekst bewerken]Êen van d' attraksjes on toeriestn België bezoekn zyn de pralienn, woada België nie ollêne weirldberoemd voaren is, moa die ook hier uutgevoendn zyn. 't Begost ollemolle met een Zwitser met de name van Neuhaus die in 1850 een apotheke in Brussel haad, woardat je ook snoep verkocht, met de name "prasline". Zyn kleinzeune hèt die branche van de commerce uutgebrêed, en in 1912 zyn d' êeste pralienn gelik damme ze nu kenn'n up de mart gebrocht.
Sedertdien zyn der veel andere Belgische bedryvn upgekommn die pralienn verkoopn gelik Godiva, Leonidas en Guylian, en nog mêer klêendere chocolatiers. In Brugge zyn der zels zoaveel chocolawinkels dat erup trekt dat ieder derde winkel in Brugge ofwel kant of chocola verkoopt.
Reeptjieschocola
[bewerkn | brontekst bewerken]Misschien minder bekend in 't buutnland, moa toch nog van goeie kwaliteit zyn merkn gelik Cote d'Or, Callebaut en Jacques, alhoewel dan de mêeste van de bekende merkn deur buutnlandse firma's zyn overgenoomn (Cote d'Or is upgekocht deur den Amerikoanse firma Philip Morris, betere bekend voa sigarettn, Callebaut deur de Zwitserse firma Suchard, en Jacques deur de Spoanse groep Natra).