Bleine
E bleine of blinne (Latyn: bulla) is een holte in of oender den epidermis (ippervel, de buutnste loage van 't vel), woarin dat er vocht zit. 't Wordt veroorzakt deur extreme verhittienge of ofkoelienge van 't vel of deur anhoudnde druk of wryvienge. In 't êeste geval klappn me van e brandbleine, in 't twêede geval geweune van e bleine, of van e drukbleine. Der zyn wel nog mêer ziektes woarby bleinn kunn vôornkommn.
Brandbleine
[bewerkn | brontekst bewerken]E brandbleine oentstoat deur contact van 't vel mè styf warme gassn, vloeistoffn of andere materioaln. Extreme koude èt 't zelfste effect. Ook sterk bytnde scheikundige stoffn kunn brandbleinn veroorzoakn. E brandbleine is e verbrandienge in de twêede groad. Der komt vocht tusschn den epidermis (ippervel) en den dermis (leervel, biendweefsel oender 't ippervel). De bleinevormienge is over 't algemêen nogal pynlyk.
E brandbleine kan 't best ofgedekt wordn vo besmettienge teegn te goan.
Drukbleine
[bewerkn | brontekst bewerken]E drukbleine oentstoat mêestal deur wrijvienge ip 't vel. Da kan kommn deur klêern die nie goed passn binst intensieve bewegienge lyk by sport, by 't werkn met alloam woarby vele macht gebruukt wordt of ip de voetn deur nieuwe schoens die nie goed passn of by lange wandeliengn. Drukbleinn zyn verre alsan klêene en moa platselyk.
In teegnstellienge toet brandbleinn meugn drukbleinn wel oopngestekt wordn, moar echt nôodzoakelyk is da nie. Doarvôorn moet e steriele noalde gebruukt wordn omda 't nie zou besmettn.
Kykt ook noa Bloebleine
|
Ofbeeldiengn die ier by passn ku je vien in de categorie Blisters van Wikimedia Commons. |