Butstekker

Van Wikipedia

Phalacrocorax carbo

De geweune butstekker (Phalacrocorax carbo, Nederlands: aalscholver), is e groote woaterveugel uut de familie van de butstekkers (Phalacrocoracidae), woavan dan der zeker 40 soortn bekend zyn.

Uutzicht[bewerkn | brontekst bewerken]

Butstekkers zyn pelikoanachtign mè glanzende zwart-groene en bruune pluumn en een ipvallnde witte koake met e gilwe vlekke an under bek. Z'hèn e lange slanke nekke en ip de boovnkant van under bek zit er een hoak. De vlerkn hen e spanwydte van e meter. Under pootn hèn zwemvliezn woadeure dan ze goed kunn zwemmn. Ze vangn vis deur te duukn.

Leevnswyze[bewerkn | brontekst bewerken]

Butstekkers rustn dikwils uut in groote groepn ip zandbankn, rotsn, stoakn of in boomn. Z'hèn gin vetloage die lik by andere woaterveugels woater ofstoot en doarom zittn ze dikwils met oopn vlerkn in de zunne vor under te droogn. Under pluumn loatn woater deure anders zoun ze nie kunn duukn. Ze vliegn in V-vorm.

Butstekker die hem lat droogn met oopn vlerkn

Eetn[bewerkn | brontekst bewerken]

Butstekkers eetn doageliks zeker 500 gram vis, moar ook schoalbeestn en amfibieën. Ze duukn zowel in zoet, zout of brak woater. Ze kunn langer of e minute oender woater bluuvn en mè zwemvliezn an under pootn kunn ze goed achter under prooie zwemmn.

Voortplantienge[bewerkn | brontekst bewerken]

Butstekkers zyn styve sociale beestn. Ze broedn dichte neffest mekoar in kolonies. 't Nest bestoat uut takkn. De wuuvetjes leggn 3 á 4 blauwe eyers die met e krytloage bedekt zyn. De joengsjes vliegn al achter twèe moandn uut en achter twèe joar zyn ze vulwassn.

Verspreidienge en leefgebied[bewerkn | brontekst bewerken]

Butstekkers leevn ip al de continentn van d'eirde, in kustgebiedn van zeeën en by meern.

In Afrika en Azië wordn speciaal getrainde butstekkers gebruukt vo vis te vangn vo de mens. E rienk roend under nekke belet dan ze de prooie zelve zoun inzwelgn.

De butstekker is e beschermde veugelsoorte. In 2008 en 2009 was ter een heftige stryd tusschn veugelbeschermers en sportvisschers over de vroage of dat de butstekker e beschermde veugelsoorte moe bluuvn of nie.

Oendersoortn[bewerkn | brontekst bewerken]

  • Phalacrocorax carbo carbo
  • Phalacrocorax carbo hanedae
  • Phalacrocorax carbo lucidus
  • Phalacrocorax carbo lugubris
  • Phalacrocorax carbo maroccanus
  • Phalacrocorax carbo novaehollandiae
  • Phalacrocorax carbo sinensis
  • Phalacrocorax carbo steadi

Externe koppelienge[bewerkn | brontekst bewerken]

Wikimedia Commons Mêer ofbeeldiengn die ier by passn ku je vien ip Phalacrocorax carbo ip Wikimedia Commons.