Ciampino

Ciampino
Ciampino binn'n de metropolitoane stad Rome
Regio	Lazio
Provinsje	Rome Ôofdstee (metropolitoane stad)
Coördinoatn	41°48′NB 12°36′OL
Ippervlak	13,38 km²
Inweuners Bevolkiengsdichtheid	38.645 (2017) 2888,27 inw./km²
Postcode	00043
Website	Officieeln site van Ciampino

Ciampino es en Italioansche stad en gemêente binn'n de metropolitoane stad Rome Ôofdstee in de regio Lazio. 't Ligt o de zuudôostkantn van Rome zelve, ip apeupri vuuftien kilomèiters van't center van Rome. Tout 1974 ôordigde Ciampino by Marino, mo wierd derachter en aparte gemêente. In 2004 èit Ciampino ôok stadrechtn gekreegn deur e preziedentiël besluut en sedertdien es 't officiël gekend lik Città di Ciampino.

Zicht ip Ciampino (mè oloundern 't stoasje)

Liggienge

Ciampino grenst an de gemêentn Grottaferrata, Marino en an 't stad Rome zelve. De gemêente èit vuuf wykn en gehuchtn (frazioni): Acqua Sotterra, Casabianca, Mola Cavona, Pantanelle en Valle Copella. In tydde van de Romein'n lag Ciampino dichte by de Via Appia (de heirboane die liep van Rome noa 't zuudn tout in Brindisi).

't Vliegpling Rome-Ciampino vanuut de lucht geziene (lienks van de landingsboane ligt Ciampino zelve, reks 't luchtoavngebouw)

Vliegpling

Ciampino es surtout gekend deur de byligg'nde luchtoavn Rome-Ciampino (Aeroporto di Roma Ciampino "G. B. Pastine"). De landiengsboane dervan ligt ip't groundgebied van Ciampino zelve, bist da 't luchtoavngebouw eigntlyk in Rome ligt (mêer bepoald in stadszone XX Aeroporto di Ciampino). 't Vliegveld wierd g'oopnd in 1916 en wos tout 1960 't belangrykste vliegpling van Rome. Derachter wierd 't vliegpling van Fiumicino grôoter en vloogn der doa mêer vliegers. De latste joarn es de luchtoavn Rome-Ciampino wel were mêer volk an't antrekkn of derveurn mè da verschilligte goekôope vliegbedryvn lyk Ryanair en Wizz Air ier ip vliegn in plekke van ip Fiumicino. Nu vliegt er joarlyks apeupri vuuf miljoen man ip Ciampino.

Ofbeeldiengn die ier by passn ku je vien in de categorie Ciampino van Wikimedia Commons.