Connecticut

Van Wikipedia

Connecticut in de Verenigde Stoatn van Amerika

Connecticut (CT) is e stoat in de regio New England in de Noordoostelyke Verenigde Stoatn. D'n hoofdstad is Hartford.

Bynoamn zyn Constitution State (officieel), Nutmeg State en Provisions State. De stoat is vernoemd noa de Connecticut-riviere die de stoat oengeveer in tweien deelt. De noame "Connecticut" komt van "Quinnehtukcut", e woord vo "lange getydnriviere" van d' Indioansche stamme, de Mohegoann.

De stoat Connecticut besloat 14.357 km². 't Grenst in 't oostn an Rhode Island, in 't noordn an Massachusetts, in 't westn an New York en in 't zuydn an 't estuarium Long Island Sound.

Historie[bewerkn | brontekst bewerken]

D' eeste Europeesche kolonistn van Connecticut woarn Hollanders. D'n Amsterdamsche zeevoarder Adriaen Block wierd in 1613 uytgezoendn vo commerce te dryvn in 't gebied die oentdekt was deur d'n Yngelschn oentdekkyngsreiziger Henry Hudson. D' Hollanders woarn g'interesseerd in 't boent van Amerikoansche pelsbeestn. In 1633 wierd e fort gebouwd deur de West-Indische Compagnie die Fort Goede Hoop genoemd wierd. 't Lag an de Connecticut-riviere, deur d' Hollanders in dien tyd Versche Rivier genoemd en 't stoend ip de plekke woar dan Hollansche boentcommerçantn in 1623 e commercepost gesticht haan. Nie vele loater arriveerdegn ook andere Europeoann en 't fort kwam assan meer oender Yngelschn invloed. Peter Stuyvesant, de gouverneur van de kolonie Nieuw-Nederland, oenderhandelde in 1650 met d' Yngelsche over e permanente grenze tusschn d' Hollansche en Yngelsche kolonies. Ze kwoamn overeen dat de grenze 80 kilometer westwoarts van Fort Goede Hoop en de Versche Rivier zou komn te lign en azo vertrokn d' Hollanders definitief uyt Connecticut.

Connecticut was één van de dertien kolonies die in d' 18e eeuwe, binst d' Amerikoansche revoluusje, in ipstand kwoamn teegn de Britsche overheersynge. De 9e januoari 1788 kwam Connecticut formeel de vuyfde stoat van de Verenigde Stoatn van Amerika.

Geografie[bewerkn | brontekst bewerken]

't Noordn van de stoat is berg- en heuvelachtig, 't zuydn redelyk vlak. Connecticut telt vele meern en riviern. De belangrykstn is de Connecticut-riviere, die vanuyt Massachusetts langst Hartford zuydwoarts noa d'n oceoan stroomt.

Hartford