Deule

Van Wikipedia
De Deule ip koarte
De gekanaliseerde Deule by Carvin

De Deule (Frans: Deûle) es e zyriviere van de Leie in de regio Hauts-de-France, in't nôordn van Vrankryk. De Deule es apeupri 60 kilomèiters lank en ountspriengt by Carency, strôomt deur Rysel en moundt uut in de Leie by Deulemounde.

Toponymie[bewerkn | brontekst bewerken]

De noame van de riviere es vermeld in 1276 lyk Dupla wa verzekers nen g'evolutioneerde vorm es van *Dubulā, gebaseerd ip't Keltisch-Gallische wôord dubu-, wa "zwort" wilt zeggn.

Verlôop[bewerkn | brontekst bewerken]

De boovnlôop van de Deule zyn eigntlyk twêe beekn: de Carency en de Saint-Nazaire, wa da ôok de noamn zyn van de gemêentn woa ze deure lôopn. Van de plekke woa de Carency en de Saint-Nazaire tegoare komm'n tout an de stad Lens strôomt de Deule ounder de noame de Souchez, wa ôok de noame es van de byliggende gemêente. Van Lens tout an Rysel es de riviere rechtegetrokkn en gekanaliseerd. 't Stik kanal van Lens tout Courrières es gekend lyk Canal de Lens.

By Courrières lôopt et Canal de Lens over in't eigenlyke Deulekanoal (Canal de la Deûle), da de Leie verbindt me de Skarpe in Dowoai, woaby da't kanal vo't grôotste stik gebruuk makt van't tracé van de Deule. Deur mynverzakkiengn ligt et kanal somstekêe e stik ôoger dan't land derround. By de gemêentn Bauvin en Billy-Berklo ester 'n ansluutienge mè 't Kanoal Ariën-La Bassée wordeure daj richtienge de Leie by Ariën kunt voarn. Ierachter buugt de Deule noar 't nôordôostn richtienge Rysel.

In Rysel liep in tydde de Deule round de middelêeuwse stadskern, vandoar ôok de noame van de stad die ip en ielandje lag ("Ter Ysel"). Achter Rysel goat de Deule were nôordwestwoarts en volgt ze apeupri were oarnen nateurlykn lôop tout an de moundienge by Deulemounde.

Wikimedia Commons