Dominicoann

’t Dominicoans kruus

Dominicoann vormn e bedelorde, die gesticht is in ’t begun van de 13e eeuwe.

De benoamienge komt van hunder stichter, den hillign Dominicus de Guzman, die d’ounrechtveirdige situoatie van oarme, zieke en oungeletterde menschn wilde verhelpn en enorm vele succes had me zyn preekn.

D’officiële benoamienge is 'predikheren'. Ze schryvn ‘o.p.’ achter hunder noame, d'ofkortienge van 'ordo praedicatorum'. De Dominicoann wierdn ook soms Jacobynn genoemd noa ‘t St.Jacobusklôoster in Parys, dat êen van hunder êeste klôosters was.

Den hillign Dominicus

Dominicus de Guzman stichtte ‘t êeste klôoster van zusters in 1207 in Prouille (Zuud-Frankryk) en ‘t êeste broederklôoster in 1215 in Toulouse. Olgauwe zound ’n zyn zusters en broeders in klêne groeptjes uut no de belangrykste steedn van Europa.

In Brugge wierd ’t Predikherenklôoster gesticht in 1234 ip e stik ground an de Langestroate, juste buutn de vroegere Oude Meulnpôorte. Da gebeurde met de steun van gravinne Johanna van Constantinopel.

Dominicus de Guzman is gestorvn in 1221 en begroavn in de St.Nicolaaskerke in Bologna.

In 1234 ist ’n hillig verkloard deur paus Gregorius IX.

Ofbeeldiengn die ier by passn ku je vien in de categorie Dominicoann van Wikimedia Commons.