Jakobinessen

Van Wikipedia
Naar navigatie springen Naar zoeken springen

Jakobinessen of dominicanessen zyn klôosterzusters. De dominicoann wierdn soms 'Jacobynn' genoemd noa ‘t St.Jacobusklôoster in Parys, dat êen van hunder êeste klôosters was.

In 1284 krêegn vier nunn: de gezusters Heymesoete en Sibilia van Dam, Margarita van Ghendt en Christina van Yper, e klêen huus in Assebroeke ip de plekke Inghelendale. Doar ountstound hunder klôoster.

Binst ‘t generoal Kapittel van de domincoann in Rysel in 1293, wierdn ze definitief anveird in de Orde van Sint-Dominicus en erkend ols nieuwe abdye.

Surtout in de 15e en de 16e eeuwe was d’abdye belangryk en ze krêegn materiële steun van de groavn van Vloandern. Van d’abdye Ten Jacoppinessen ter Inghelendale by Brucghe bestoat ollêne nog d’ingangspôorte, e stik van de kapelle en e dubbele hofstee.

In 1500 zochten de klôosterliengn e refuge in Brugge. ’t Concilie van Trente gaf hunder de road van binn de stadsmeurn te goan weunn binst d’oorlogsjoarn.

In 1534 kochtn z’e stik ground in de Clophamerstroate, nu de Jacobinessenstroate, woa dat ook ‘t Magdalenagasthuus stoat. In de twiddn helt van de 16e eeuwe wierd ‘t nog gevoarlikker buutn de stadspôortn en in 1578 verhuusdn ze definitief no Brugge. In 1597 begostn ze me den bouw van e nieuw klôoster. Inghelendale in Assebroeke was hêlegans leeggeplunderd en wierd ofgebrookn.

De 17stn moarte 1783 wierdn de nunn ounder Jozef II verjoagd uut hunder klôoster in de Jacobinessenstroate. 't Gebouw wierd stoatseigndom en in november 1796 oopnboar verkocht en ofgebrookn. Ze woarn verplicht van uut makkoar te goan, mo toch was da nie ’t ende van Inghelendale.

Benedicta Van Compernolle, de latste nunne die overblêef, stierf in 1840. Heur neve kocht in 1834 de ground in de Jacobinessenstroate en je wilde doar e psychiatrisch gesticht, zothuus genoemd, iprichtn lik in Sinte-Machiels. J’ounderhandelde me de zusters van Kortryk. Den 6dn oktober 1846 kwoamn d’r twi nunn no Brugge vo te werkn in ‘t Sint-Dominicusinstituut en in 1847 nog ’n derde. In 1854 woarn d’r ol 19 nunn.

In 1865 kochtn ze ‘t Walleke van de broeders Xaverioann an de Vlamingdam en bouwdn d’r e slotklôoster da den 29stn april 1867 ingewyd wierd en 'Engelendale' genoemd wierd, de noame die verwyst noar hunder verre geschiedenisse.

In de joarn 90 van de 20ste eeuwe wierd ’t klôoster ofgebrookn vo plekke te moakn vor e modern complex volgns de nieuwe normn van e rusthuus, vo d’r e weunzorgcentrum van te moakn.

De patrôonhillige van de congregoatie Engelendale van nu in Brugge is Catharina van Siëna.