Duunkerke I
Duunkerke I es d'eeste van de Duunkerke transgressies die zorgdn vo grote, bluvende overstromiengn an de kustvlakte. Duunkerke I deurde van de 2e eeuwe v.C. tout de 1e eeuwe n.C.
In die periode deurbrikt de zee d'oude duunn die 5.000 joar geleen an uze kust gevormd èn gewist. De kustlyne verandert helegansn, want lanksn de kustvlakte ountstoan d'r bree geuln of kreekn die zout woater landinnewoars briengn.
Die kreekn oundergaan de getydn van de zee. By vloed loopn ze zynder over en 't land round die geuln gerakt overstroomd. 't Gebied da zo ollene moar by vloed ounder woater komt te stoan, noemt slikke. Up slikkn keunn d'r ollene moar halofytn gruujn, da zyn plantn die teegn zout woater keunn.
Achter Duunkerke I krygn me en kalme periode mè de Romeinsche regressie. In die periode ountstoundn d'r nieuwe duunn en dus e nieuwe kustlyne.