Ferdinand I van Ôostnryk

Van Wikipedia
Ferdinand I
1793-1875
Keizer Ferdinand I deur Friedrich von Amerling (Heeresgeschichtliches Museum Weenn)
Keizer van Ôostnryk
Periode1835-1848
VôorgangerFrans I van Ôostnryk
IpvolgerFrans Jozef I
Eirtshertog van Ôostnryk
Periode1835-1848
VôorgangerFrans I van Ôostnryk
IpvolgerFrans Jozef I
Keunienk van Hongareye, Krowoasje en Boheemn
Periode1835-1848
VôorgangerFrans I van Ôostnryk
IpvolgerFrans Jozef I
VoaderFrans I van Ôostnryk
MoederMaria Theresia van Bourbon-Sicilië

Ferdinand I Karel Leopold Jozef Frans Marcellin (Weenn, 19 april 1793 - Praag, 29 juni 1875) was den oudste zeune van keizer Frans I van Ôostnryk en Maria Theresia van Bourbon-Sicilië, en de twiddn van de vier Ôostnryksche keizers van ‘t Huus Habsburg-Lotharingen.

Je was keizer van Ôostnryk als Ferdinand I en keunienk van Hongareye, Krowoasje en Boheemn als Ferdinand V.

't Keizerryk wierd tusschn 1836 en 1848 in feite besteurd deur de Geheime Stoatsconferensje in noame van Ferdinand omdat ie epileptisch en gêestelik ziek was. Zyn voader Frans I had de Geheime Stoatsconferensje ipgericht vo zyn zeune t’ountlastn. De vôorzitter was Frans I zyn broere Lodewyk. D’andere leedn woarn Ferdinand zyn joungere broere Frans Karel, Klemens von Metternich en Franz Anton von Kolowrat-Liebsteinsky.

Metternich was belast me Buutnlandsche Zoakn en ie en Lodewyk woarn anhangers van ‘t absolutisme. Kolowrat, verantwôordelik vo Binnlandsche Zoakn en Finansjes, was mêer liberoal.

Binst de Moarterevoluusje van 1848 vielt de Geheime Stoatsconferensje uutêen. De conservatieve Metternich most vluchtn en Ferdinand most oftreedn. Kolowrat kwamt den êeste constitutioneeln minister-president van Ôostnryk.

Ferdinand z'n broere Frans Karel zag of van 't keizerschap ounder invloed van zyn vrouwe Sophie in 't vôordêel van under 18-joarign oudste zeune, Frans Jozef.

De krônienge van Ferdinand tout keunienk van Boheemn in 1836 in de Sint-Vituskathedroale in Praag
Wikimedia Commons