Groendels

Van Wikipedia

De groendels (Gobiidae) zyn e familie van de groendelachtign (Gobiiformes), êen van de grotste visfamilies mè mêer of 2000 sôortn in mêer of 200 geslachtn. De mêeste zyn relatief klêene, minder of 10 cm lank. Sommigte grôte groendels kommn wel 30 cantimeter, moa dat is wel uutzoenderlyk. Groendels zyn over 't algemêen bodembeweuners. Z' eetn klêene oengewevelde bêestjes, andere klêene visjes en planktong.

De mêeste groendels wordn nie g'eetn deur de mens, moa 't zyn wel prôoibêestjes vo vissn lyk kabeljauw, schellevis, zêeboars en platvis. Verschillige sôortn zyn ook aquariumvissn.

Specifieke kenmerkn by de morfologie van de groendels zyn de soamngevoegde buukvinn die e schyvevormige zuugmoend vormn, woarmee dan z' under vastezettn an rotsn en koroalriffn. In aquaria kunn z' under vastezuugn an de gloazn wand.

Groendels zyn verspreyd over hêel de weireld in tropische en gemoatigde streekn, de mêeste in zêe by kustn en koroalriffn, moar ook in brak en zoet woater.

Sommigte groendels leevn in symbiose met andere sôortn, lyk geirnoars. De geirnoare groaft ton een hol in de bodem woarin dat 'n tegoare met de groendel weunt. Ze profiteern alletwêe van die reloasje. De geirnoare die nie zo goed ziet, krygt e woarschuwienge by gevoar en de groendel krygt e veylig huus en e plekke vor eyers te leggn.

Subfamilies[bewerkn | brontekst bewerken]

De familie Gobiidae is in de 5e uutgoave van Fishes of the World groendig herzien. Vodien bevattegn de Gobiidae zes subfamilies: Gobiinae, Benthophilinae, Amblyopinae, Gobionellinae, Oxudercinae en Sicydiinae. D' herzienienge bewoarde d' êerste twêe subfamilies en verplatste d' andere viere noar een ofzoenderlyke familie, d' Oxudercidae.

Wikimedia Commons