Jacques de Châtillon
Jacques de Châtillon (ca. 1260 - 11 juli 1302) was e Franschn edelman die in 1300 deur keunink Filips IV van Vrankryk angesteld wierd toet landvoogd van 't groafschap Vloandern. Je was e zeune van Gwyde III van Saint-Pol en van Mathilde van Brabant.
Jacques de Châtillon was ols landvoogd gèen goeie keuze. J' ha weinig inzicht in de specifieke situoasje in Vloandern, woar da steedn lik Gent, Brugge en Yper veel machtiger en ryker woarn of gelyk welke Fransche stad en sterk ip hunder autonomie en stoatus steundn. Je besefte de teegnstellingn nie die bestoendn tusschn d' anhangers van de groaf (lieboards) en de dee van de keunink (lelioards), moa binnen de steedn ook nie tusschn de patriciërs die 't bestier in handn ha'n en 't geweun volk. En 't volk wilde surtout polletieke insproak. Châtillon steunde toet hunder grôte colère de patriciërs. De stielmannen stoendn ton ook massoal an de kant van de lieboards.
Châtillon makte e foute deur, by de bezettinge van Brugge, zyn soldoatn in de stad te loatn overnachtn. Binst de Brugse Metten wierd er e dêel vermôord deur Brugse ipstandelingn binst dan d' andere vluchtegen noa 't kastêel van Kortryk. Châtillon kost nog juste oentsnappen deur hem te verklee'n in een oarme mens. Lik zovele Fransche edelmannen, ist ie e poar moandn loater gesneuveld binst de Guldenspôrenslag.