Jan Fevijn

Van Wikipedia

Jan Fevijn, ôok wel Jan van Fevijn of in e gelatiniseerde versie Johannes Fevynus enoemd (Veurne, 10 meie 1490 - Brugge, 23 oktober 1555) wos e Vlamsche gêestelykke en humanist.

Biografie[bewerkn | brontekst bewerken]

De familje Fevijn wos verwant me de familje Hedenbault, die olletwêe traditionêel verboundn woarn me 't Bourgondische hof. Achter den vroegn dôo van under voader, wierdn Jan Fevijn en zyn zuster ipgenoomn in't gezin van Filips van Hedenbault en, achter Filip zyn dôo, van zyn broere Karel van Hedenbault. De fevijns weunden in dien tyd by Karel van Hedenbault in 't Prinsnhof in Brugge, me da tie em angesteld wos als vertrouwnsman vo 't oenderoud ervan.

In 1506 schreef Fevijn em in de pedagogie De Lelie in Leuvn. Nog byst zyn studentntyd wierd ie in 1510 beneficioarisse van de 25ste prebende van kanunnik in de Sint-Donaaskathedroale. In 1511 woarn zun studies in Leuvn grêed en trok tie em na Bologna en wierd er doctor in beyde rechtn. Achter da tie wos weregekeerd uut Itoalië wierd em tout paster geweyd en vanof 1523 wostie scholaster ofte directeur van de kapittelschole. Je bleef tot in 1527 in't Prinsnhof weunen woar da tie ounder and're zorgde vo wa ter oovrgebleevn wos van de dierntuun, surtout vo d' exotische veugels. In 1519 wierd em bedankt deur Desiderius Erasmus vo't vrêe angenam verblyf da tie der by zyn bezoek an Brugge ad g'ed. Achter 1527 weunde Fevijn langsn den Dyver, juuste neefnst 't Gruuthusepaleys.

Fevijn a teffrente contactn in Brugge me de humanistn Juan Luis Vives en Marcus Laurinus. J'ed ôok and're humanistn lyk Erasmus, Franciscus van Cranevelt en Thomas More ontmoet byst ulder verblyf in Brugge en je bleef med under in contact via brievn. Surtout me Franciscus van Cranevelt adn em grôote correspondensje. Ôok droegn Adrianus Barlandus en Hubertus Barlandus sommigste van under werkn ip an Jan Fevijn. In 1524 zeegnde ie den trouw in van Juan Luis Vives en Margareta Valldaura, die alletwêe maraños (bekêerde Joodn) woarn.