Jan Heem
.jpg)
Jan Heem (ende 13e êeuwe - begun 14e êeuwe) was e Vlamschn ambachtsman en polletieker. Zyn geboortejoar en sterftedoatum zyn nie bekend. In feite had Jan Heem t'hope mè Jan Breydel en Pieter de Coninck ip 't standbeeld ip de Grôte Markt van Brugge moetn gestoan hèn.
Ipstand
[bewerkn | brontekst bewerken]Os d' ipstandelingn in moarte 1302 an de macht kwoamn, wierd de loaknvolder Jan Heem angesteld ols burgemêester van Brugge. Je was ambachtsman en assan t'hope te vindn met de wever Pieter de Coninck.
De 26e moarte 1309 was Jan Heem t'hope mè Pieter de Coninck en den bêenhouwer Jan Breydel anvoerder van e volksipstand in Brugge. Den 18e november 1321 woarn Jan Heem en Pieter de Coninck d' anvoerders van e radicoale fractie van wevers, volders en scheirders die hunder verzettegn teegn e vredesverdrag mè Vrankryk. Binst de Boerenipstand van Kust-Vloandern van 1323-1328 en binst de slag van Kassel (23 augustus 1328) was Jan Heem were êen van de Brugse leiders. Achter 't neresloan van dien ipstand was-t ie êen van de vele hoenderde Bruggelingn die noa Vrankryk getransporteerd wierdn ols gyzeloare.
Vieringe
[bewerkn | brontekst bewerken]In 1867 wierd d'êerste Breydel- en De Coninckcommissie ipgericht, moa van Jan Heem was-t er gèen sproake. Êrevôorzitter van de Commissie, de schryver Hendrik Conscience, had in zyn 'Leeuw van Vlaanderen' de figeure van Jan Heem over 't hoofd gezien. De zestien beeldhouwers die an de wedstryd vo 't standbeeld mochtn meedoen, krêegn allêne moa de figeurn Breydel en De Coninck ols oenderwerp. Ook in 't Breydel -en De Coninckjoar in 1987, by d' hoenderdste verjoardag van 't standbeeld, is-t er in de vele publicoasjes nôois meldinge gemakt van Jan Heem.
In 2002 is-t er nu wel e twêejoarlikse Jan Heem-Prys ingesteld. 't 11 Juli-Komitee van de stad Brugge wil doarmee hulde briengn an e persôon, instantie of organisoatie die bygedreegn hèt toet 't versterkn van 't Vlams bewustzyn.