Jean-Léon Huens
Jean-Léon Huens (Melsbroek (Vlams-Broabant), 1 december 1921 - Benissa (Alicante Spanje), 24 meie 1982) was 'n Belgischn illustrateur.
De noame Huens zegt de mêeste menschn nie vele, moa vele Belgn die ipgroeidn in de joarn 1950-1960 kenn wel d'illustroasjes die Jean-Léon Huens gemakt het vo de reekse 's Lands Glorie. Huens makte bykan 550 werksjes ip postkoartformoat over d'hoogtepuntn en belangrykste figeurn uut de Belgische geschiedenisse. Vele jounges in dien tyd kregen de gouste te pakkn vo mêer te weetn over geschiedenisse deur te fantaseern over Huens zyn romantische, realistisch getêkende prentjes. Tusschn 1949 en 1961 kwoamn der zes boekdêeln uut by uutgeverye Historia, ipgericht in 1946 deur Jean-Léon Huens en zyn broere Etienne. In iedern album kostn der 80 toet 100 zantjes worden geplakt die spoarders van Historiapuntn kostn inwisseln. Ounder de prentjes stound er e kortn tekst van historicus Jean Schoonjans, professor an de Facultés Universitaires Saint-Louis in Brussel. D'historische ipvattiengn kwoamn van de Gentsche historicus Henri Pirenne.
De geschiedenisse van België van Huens en Schoonjans was ingedêeld in drie grôte periodes over elk twêe boekn:
- 't Belgisch Volk: Van 't begun toet de 15e êeuwe
- De Belgische Stoat: Van de 15e toet de 18e êeuwe
- 't Keunienkryk België
Jean-Léon Huens het ook illustroasjes gemakt vo d'uutgeveryen Casterman, Marabout, Desclée De Brouwer en Durendal. J'hè covers getêkend vo 't weekblad Tintin (Kuifje) en wenskoartn en kalenders, uutgegeevn deur bekende drukkeryen lik De Schutter in Antwerpn.
Vanof 1962 het 'n hem gericht ip den Amerikoansche markt, deur gebrek an interesse in eign land. Werk van hem is gepubliceerd in de Saturday Evening Post, Readers' Digest en National Geographic Magazine.
Den 20stn juni 2002, twientig joar achter zyn dôod, krêeg Jean-Léon Huens de Hall of Fame Award, deur de Society of Illustrators in New York. Doadeure ist 'n ipgenoomn in de internationale êregalerye van illustrateurs.
Den 1stn september 2005 opende 't Keunienklik Legermuseum in Brussel de tentôonstellienge "'s Lands Glorie. (De geschiedenis van België doorheen de prenten van Jean-Léon Huens)", toet 31 moarte 2006 in 't kader van "175 joar België".