Krommenelst
- Dit artikel es geschreevn in 't Ypers, en da zou best ozô bluuvn.
'n Krommenelst is e wyk die up 't groendgebied van Vloamertienge ligt, mo die e stik is van de parochie Dikkebus. Olle inweuners van 'n Krommenelst kunn oek e stemme krygn in 'n Dorpsroad va Dikkebus.
Geschiedenisse
[bewerkn | brontekst bewerken]'n Krommenelst wos vroegerder joarn en êerlikeid die lei up 't groendgebied van Vloamertienge, Dikkebus en Vormezêle en wos vele grodder en belangryker of nu.
'n Krommenelst et, juste lik Vloamertienge, ossan e slichte noame at. In 't wôornboek der toponymie van Westelik Vloandern (De Flou) stoat er 't Is ongeloovelik wat voor groote questezoekers die van Vlaemertinghe en Krommenelst zijn. Oek de lapnoame van d'iweuners van Vloamertienge zevve (pottebrekers) zegt doar etwot over.
D'ekse van 'n Krommenelst
[bewerkn | brontekst bewerken]In gin aar plekke dan 'n Krommenelst kust er roend 1640 en ekse zittn. Neur noame wos Catheline Lorteau (mo de menschn zein der oek Catheline Smets teegn omda neur vint e smet wos). Ze zoet olle sôortn va droevigeedn uutestookn en, ollemoale in dienst van 'n Duvel, die neur evroagd adde voe nem te dienn. Ze gaf dadde toe beisn en oendervroegienge (tortuur) in 't gevang van 't Zoalof. Uut olles da ze zeie, kusn de rechters uutmoakn da ze en ekse wos (te wesen eene toveresse).
Uuteindelik is ze leevnd upebrand up de Mart van Yper up 27 februoari 1644. In 't Crimineel Register up doatum van 27 februoari 1644 stoat er: Condemneeren mits desen ghelevert te worden in handen van den officier crimineel omme ghebrocht te worden up een schavoot voor het huys deser Casselrie ende aldaer ghejusticiert te wordene metten viere soo datter de doot naer volght ende daernaer u lichaem gheexponeert te worden ter luchte up een rat ter plaetse ordinaire.
Doarachter wos iederêen koetent, toet dan der twêe beweuners van 'n Krommenelst dôodgiengn in 1646. De vloek van d'ekse van 'n Krommenelst, zein der vele...