Laudate Dominum

Dat artikel es geschreevn in 't Noordelik West-Vlams.

---

Laudate Dominum zyn de begunwôordn van Psalm 116 (grieksche tellienge) of 117 (eebrêewsche tellienge) in 't latyn. Lik de reste van de Psalmn, wordt Laudate Dominum ofgeslootn in de romeinsche rietuus mêt e lofpryzienge van d' Illige Drievuldigheid Gloria Patri... . In de katlieke kerkn, wordt die psalm gezoengn binst de zeegnienge van 't Illig Sakrament .

Tekste

Latynsche tekste	Vertoalienge in 't Westvlams
Laudate Dominum omnes gentes Laudate eum, omnes populi Quoniam confirmata est Super nos misericordia eius, Et veritas Domini manet in aeternum. Gloria Patri et Filio et Spiritui Sancto. Sicut erat in principio, et nunc, et semper. Et in saecula saeculorum. Amen.	Pryst den Ȇere, aal de noasjes, Pryst êm, aal de volkn Van zyn kompasje vor uus stoa vaste lik e rotse, en de woareit van den Ȇere bluuft in êewigheid. Ȇere an de Voadre en de Zeune en den Illige Gêest, lik of dat was in 't begun, en nu, en altyd, en vo d' êewn der êewn. Aamn.

Muziek

Oewel da de tekste deur verschillnde klassieke tôondichtrs bewerkt wierd in hêel wa tydperkn, lik Antonio Vivaldi of William Byrd, is de mêest bekende muziek ip die psalm misschiens de deeze die we te dankn ên an Wolfgang Amadeus Mozart. Doarin wordt 't stik gezoengn deur e soproan mê kôor, en ist 't vuufde dêel van zesse in e grotre werk dat gekend is lik Vesperae solennes de confessore (Köchels indêelienge 339). Van den andre kant, een andre styf gekende versje van 't Laudate Dominum wierd verwerkt in 't graduoal van de Hongoarsche Krôoningsmesse da getôondicht is deur Frans Liszt.

Ook bestoatr e moderne versje van de powremetoal-bend Helloween, da stoat in undre 'n albom Better than Raw, mê d'ôorsproenklikke latynsche tekste.

Eksterne koppliengn

• Muziek van William Byrd.
• Muziek van Wolfgang Amadeus Mozart.