Marc Sleen

Van Wikipedia
Marc Sleen in april 2012
Marc Sleen (in 't middn) in 1992, met Jan Bucquoy (lienks) en Pirana (rechs) in 't Belgisch stripmuseum

Marcel Honoree Nestor Neels (Gentbrugge, 30 december 1922), beter gekend ounder zyn pseudoniem Marc Sleen, is een Vlamse striptêkenoare die voarol bekend stoat vô zyn strip De avonturen van Nero & Co.

Jeugd[bewerkn | brontekst bewerken]

Marc Sleen werd geboren als Marcel Neels in Gentbrugge, moa zyn ouders verhuusdn noa Sint-Niklaas ot je drie moandn oud was. Ol van joungs of hield Marc Sleen vrêed van bêestn, en je têkende z' ook geirn. Vanof zyn vêertiensten volgde tjie zundagstêkenklassn an d' Academie van Sint-Niklaas. Da wierd wel een endetje moeilyker os zyn voader in 1939 stierf angezien dat de familie 't moeilik haad vô 't hoofd financiêel boven woater t' houdn. Gedeurende den Twidde Weireldoorloge wierd Marc Sleen in 1944 in 't gevang gesmeetn omdat êen van zyn oudere broers by 't verzet actief was.

Vroege carrière[bewerkn | brontekst bewerken]

Achter de bevrydienge, up 't ende van 1944, begost Marc Sleen as een cartoonist ter werkn by De Standaard, woardan andere mensn gelik Gaston Durnez en Marnix Gijsen actief woarn. De gazette wierd achter den ôorloge ommegedopt toet De Nieuwe Standaard en in 1946 toet De Nieuwe Gids. Beholve cartoons makte Sleen ook illustroasjies vô verschillende artikels. Je têkendige ook een stripreekse De Avonturen van Neus in Ons Volk, en in 1945 kwaam De Avonturen van Piet Fluwijn en Bolleke vô 't êeste uut.

Marc Sleen beslôot voarol strips te maakn deurda Willy Vandersteen zô'n succes haad met zyn stripreekse Suske en Wiske in De Nieuwe Standaard, en Sleen zaag dat er mè strips beter te verdienn was dan mè cartoons.

Nero[bewerkn | brontekst bewerken]

In oktober 1947 begost Marc Sleen een nieuwe stripreekse, De avonturen van Detective Van Zwam. In 't êeste album, Het geheim van Matsuoka, was Van Zwam d' hoofdfigeure, woardat je een gast tegenkomt in 't zothuus die peist dat je keizer Nero is. Zels ot je were by zyn verstand is bluuft iederêen hem "Nero" noemn. Achter drie verhoaln wordt Nero de centroale figeure van de reekse, en achter negen verhoaln wordt "Van Zwam" deur "Nero" vervangn in de titel van de reekse.

In 1965 stapte Marc Sleen over noa de De Standaard/Het Nieuwsblad, wa da praktisch toet een rechtszake lêede tusschn De Nieuwe Gids en De Standaard over auteursrechtn. Van ton of liet Sleen ol d' andere reeksn volln en legdig' hem ollêne toe up Nero & Co.

Marc Sleen was ook gekend as een bêestnliefhebber en een reiziger die tusschn 1961 en 1991 35 safari's noar Afrika maktige, en mêer dan 20 documentaires vô den VRT. In 1992 verscheen Marc Sleen in 't Guinness Book of Records vor up zyn êentje de zelste strip getêkend t' hèn gedeurend' een periode van 45 joar.

Andere reeksn[bewerkn | brontekst bewerken]

Toet an 1965 têkende Marc Sleen nog een hêleboel andere reeksn:

Piet Fluwijn 24-12-1944 toet 07-01-1945
De avonturen van Neus 24-12-1944 toet 22-04-1945
Tom en Tony 10-06-1945 toet 24-10-1946
Piet Fluwijn en Bolleke 27-12-1945 toet 14-04-1965
Pollopof 13-01-1946 toet 12-10-1952
Stropke en Flopke 24-10-1946 toet 08-06-1950
De Lustige Kapoentjes 09-02-1950 toet 14-04-1965
Doris Dobbel 08-04-1950 toet 04-02-1967
Joke Poke 06-05-1950 toet 21-06-1951
Stropke 22-07-1950 toet 27-12-1952
Fonske april 1951 toet oktober 1960
Octaaf Keunink 16-11-1952 toet 04-04-1965

Vanof 1947 toet an 1965 têkende tje ook ieder joar een verslag van de Rounde van Vrankryk.

Wikimedia Commons