New South Wales

Dat artikel es geschreevn in 't Noordelik West-Vlams.

New South Wales (ofgekort NSW) is e stoat in 't ôostn van Australië. D' ippervlakte bedroagt 801.150 vierkante kilometer en der weunn mêer of 8 miljoën menschn, woarmee da 't de dichtstbevolkte stoat van Australië is. D'n hoofstad en grotste stad is Sydney.

New South Wales grenst in 't nôordn an Queensland, in 't zuudn an Victoria en in 't westn an Zuud-Australië. De kust grenst in 't ôostn an de Koroalzêe en de Tasmanzêe. 't Australian Capital Territory en Jervis Bay Territory zyn enclaves binn de stoat. De drie belangrykste steedn zyn Newcastle, Sydney en Wollongong, die alle drië an de kust lign.

De kolonie van New South Wales wierd in 1788 gesticht lik e Britsche strafkolonie. 't Omvatte êest mêer of d'n helt van 't Austroalisch vasteland. Binst de 19e êeuwe wierd 't grotste dêel van 't gebiëd van de kolonie losgemakt vor aparte Britsche koloniën te vormn die uutendelik de verschillige stoatn en territoria van Australië kwoamn. D' ôorsproenkelike beweuners van New South Wales woarn d' Aboriginalstamn die à peu près 40.000 toet 60.000 joar gelee'n in Australië arriveerdegn. Vó d' Europeesche vestigynge weundn der noa schattynge 250.000 Aboriginals in de regio.

New-South-Wales wordt oenderverdêeld in vier dêeln:

E smalle kuststroke, met e gemoatigd klimoat an d' uterste zuudkust en e subtropisch klimoat an de grenze van Queensland.
De bergachtige gebiëdn van 't Grôot Austroalisch Schèidyngsgebergte (Great Dividing Range) en d' hooglandn der roend.
D' agrarische vlaktes, die e grôot dêel van d' ippervlakte van de stoat uutmoakn en vele minder dichtebevolkt zyn of de kust.
De droge, woestynachtige vlaktes in 't verre nôordwestn van de stoat.

Zicht ip Sidney
Kustlyne van Wollongong
Three Sisters in 't Nationaal park Blue Mountains
Hunter Valley, wynstreke

Ofbeeldiengn die ier by passn ku je vien in de categorie New South Wales van Wikimedia Commons.