Nicolas de Largillière

Van Wikipedia
Naar navigatie springen Jump to search
Dat artikel es oorsprounkelik geschreevn in 't Kustwestvlams.

Zelfportreit

Nicolas de Largillière, ook Largillierre gespeld (Parys, 20 oktober 1656 - Parys, 20 moarte 1746) was e Fransche barokschilder die ipgroeide in Antwerpn. Je schilderde landschappn, stilleevns en portreitn.

Largillière was de zeune van e commerçant van Parys. An zyn drie joar verhuusdn ze noar Antwerpn woar dat 'n vanof 1668 werkte in den atelier van Anton Goubau. In 1674 wierd 'n lid van de Sint-Lucasgilde van Antwerpn.

Je vertrok ton noar Iengeland van 1675 toet 1679. Je kwam doa Peter Lely teegn, de populairste portreitschilder in Iengeland in dien tyd, die zovele werk had dan 'n hulpe kost gebruukn. Je mocht tegoare mè nog andere de draperien, accessoires en blommn schildern ip zyn schilderien. Lely had hem werkn zien restaureern in Vloandern en je recommandeerdeg' hem by den hoofdinspecteur van gebouwn van de keunienk van Iengeland, die hem verschillige tableaux van mêesters liet restaureern, oender andere in Windsor Castle.

Largillière had doa zovele succes dat 'n der an peisde van hem te vestign in Londn. Moar ip da zelfste moment kwoamn der religieuze spanniengn in 't land. 't Parlement begost katholiekn te vervolgn en buutnlanders van da geloof krêegn ipdracht van te vertrekkn.

Were in Frankryk in 1679 wast 'n e veelgevroagde schilder van den oadel, die portreitn by hem besteldn. Je trouwde In 1699 mè Marguerite-Élisabeth Forest en ze krêegn twêe dochters en e zeune. Vanof 30 moarte 1686 wast 'n lid van de Keunienklike Academie vo schilder- en beeldhouwkunst. In 1736 kwamt 'n doa directeur en in 1743 kanselier.

Je stierf in 1746 an zyn 89 joar.

Ênigte werkn[bewerkn | brontekst bewerken]

  • De familie Stoppa (1685), musée de l'Hôtel-Dieu, Château-Thierry
  • Portreit van Charles Le Brun (1686), musée du Louvre, Parys
  • La belle Strasbourgeoise (circa 1703), musée des Beaux-Arts van Strasbourg
  • Zelfportreit in schilderstenue (1707), verkocht vo 514 250 € in 2004
  • Zelfportreit (1711), musée du Château de Versailles
  • Portreit van de gravinne de Noirmont geklêed lik Diana (1715), privécollecsje
  • Vanitasstilleevn, Museum de Fundatie in Zwolle
Wikimedia Commons