Orde van de Vlamsche Lêeuw (Vlaams Parlement)
D' Orde van de Vlamsche Lêeuw (nie te verwarrn met d' prys uutgerêekt deur de Vlamsche Verênigienge) is een êretêekn ingesteld deur 't Vlams Parlement in 1995.
't Is een variante van de Belgische Krôonorde en de Leopoldsorde vo de Vlamsche regio. De statuutn van den orde zyn goegekeurd drur 't Vlams parlement in een butengeweune zittienge van 1995. De nominoasje wordt up vôordracht van een specioal ingestelde commissie gedoan.
De name van d' orde kom van 't symbool van Vloandern, de klemmende lêeuw van sabel (zwart) up een goudn veld. De Vlamsche Lêeuw was ol in de middelêeuwn 't symbool van Vloandern en 't motto van den orde "Vlaanderen de Leu" of "Vlaendren ende Leeu" wierd in de middelêeuwn ol as een leuze gebruukt.
Up 13 juni 1995 wierd der een vôorstel ingediend deur Marc Olivier| en t' hope oundertêkend deur Joachim Coens, Leo Delcroix, Michel Doomst, Herman Suykerbuyk, en Marc van Peel. Ze zegdn dat de byzoundere wetgevienge vo de bevoegdheedn van de Vlamsche Gemêenschap 't uutrêekn van êretêkens nie in de weg stound.
Oundanks 't Artikel 114 van de Belgische Groundwet, die kost g'interpretèrd wordn dat ollêne de federoale regerienge burgerlike ordn kand uutrêekn, steldn ze da, ot de Vlamsche Gemêenschap bevoegd is vo zyn eigen vlagge, zyn eigen wapen, zyn eigen volkslied en zyn eigen fêestdag kud instelln, ton moetn z' ook 't recht hèn van under eigen ounderescheidiengn in te stelln.
De vôorzitter van de Vlamsche regerienge is de Grôotmêester van den Orde van de Vlamsche Lêeuw, en den orde kreeg, gelik da 't mè moderne ridderordn geweunlik is, vuuf groadn. De reloasje tusschen d' Orde van de Vlamsche Lêeuw en d' ordn van de Belgische stoat gelik de Leopoldsorde en de Krôonorde stoan nog nie vaste.
- 1° êeste klasse : grôotofficier;
- 2° twidde klasse : commandeur;
- 3° derde klasse : officier;
- 4° vierde klasse : ridder.
- Leedn van de vuufde klasse voern gin titel.
Den hoogste groad van een grôotlint of grôotkruus bestoa nie binn'n d' orde.
De verênigienge "Orde van de Vlamsche Lêeuw" besloot achter d' inrichtienge van 't êretêekn deur 't Vlams Parlement dan ze zoun bluuvn under polletiek ounafhankelike "Orde van de Vlamsche lêeuw" vôortzettn.
't Vorstel van decreet toet instellienge van d'orde wierd nooit à fong behandeld en verviel dus ôok ip 't ende van de legislateure in 1999.