Ouwdurp
Ouwdurp (Hollans Ouddorp) is 't meêst westelijke durp op 't Hollanse eiland Goeree-Overflakkee. Per januaori 2023 hao 't durp 6.295 inweuners en d'rmee is 't nae Sommerdiek 't groôste durp van 't eiland. Saeme mit Goeree en Stellendam vurmt et sind 1966 de gemeênte Goeree. De belangriekste middels van bestoan binne de visserieje, et toerisme en de landbouw.
Landbouw
[bewerkn | brontekst bewerken]De landbouw is 't ouwste van de drieje. 't Landleven op Ouwdurp was altied nogal kleinschaelig in das noe relatief nog zôô. Vroeger wier d'r veel bloomzaed in sjelott'n eteelt. De leste jaeren worre d'r aok steeds meer blomen ekweekt. Ouwdurp lig op de grens van zand - in kluigrond in veur sommige gewassen is dat ideaal. An de aore kant is zand niejt zôô vruchtbaer vandeer dat veel percelen een stik ofegrave binne, uutmiene hietende dat. De grond wier in wallen langs de percelen egooit. Je kriegt hiermee een apart beslote lanschap wat een schurveliengenlanschap enoemd wordt. Op Ouwdurp zelf worre deze schurveliengen trouwes; 'hoagten' enoemd.
Visserieje
[bewerkn | brontekst bewerken]De visserieje op Ouwdurp is opebloeit sind dat 't durp een eige haevene heit. Die haevene is in de jaeren 1860-1861 egraeve. Vroeger hao Ouwdurp veural gornetvissers mar nae de ofsluuting van de Grevelingen bin 't aok zêêvissers eworre. Zêêvissers visse veural op tonge in scholle. Sind de ofsluuting in 1972 leit de Ouwdurpse vloot op Delta in Stellendam. De vloot bestoat nog uut zo'n vuuftien kotters weervan d'r twêê paelink visse op de Grevelingen vanuut de ouwe haevene. Veur de rest word de ouwe Ouwdurpse haevene noe veural veur jachen gebruukt.
Recreaosie
[bewerkn | brontekst bewerken]'t Toerisme is opekomme nae den Twêêde Wereldoorlog. Ouwdurp wier antrekkelijk vanwege 't strange in de natuur. In de beginjaeren bin d'r ontzett'nd veel zeumerhuusies in campings uut de grond estampt. Soms slechte van kwaliteit. Gelokkig is ter noe wel andacht veur kwaliteit. 't bin noe veural luxe vekantieparken as Port Zélande, Noordzeêpark in De Klepperstee. Ouwdurp stoat tot vaorde in Duusland bekend as femilie badplekke.
Durpsstructuur
[bewerkn | brontekst bewerken]Oorspronkelek bestieng Ouwdurp uut lintbebouwing langs een antal wegen. De ienige concentraotie was rond de kaereke in de rienk. Vanof 1960 binne d'r een paer vrie grôte stikken bie ebouwd an de noordkant van 't durp, 'Plan ôôst' in 'Plan zuud'. De leste jaeren is dat veranderd in noe wordt d'r haest niejt meer nieuw ebouwd vanwege regels vanuut de provincie. D'r spele in de durpsgemêênschap dichte discussies omdat Ouwdurpse starters op de weuningmart gin huus kunne kaope omdat et te diere is in omdat er weinig geschikte huuzen te kaop binne.