Phil Taylor
Phil Taylor (hêlegans: Philip Douglas Taylor, bynoame: The Power, 13 oest 1960, Stoke-on-Trent) is en Iengelschn professioneeln veugelpieker. En het 't record van de mêeste weireldkampioenschappn (16) en oek van de mêeste uutezondn 9-darters (uutsmytn me neegn pyls) en is oundermêer doadeure deur de mêeste kenners anzien lik 'n bestn veugelpyker ôois.
Jeugd
[bewerkn | brontekst bewerken]Taylor is ebôorn in Burslem by Stoke-on-Trent in Iengeland en 'n is toet zyn 16 no 't schole ewist. 't Is mor in 1986 dat 'n serieux is begunn smytn, toun at 'n verhuusde nie verre van 'n pub van Eric Bristow, 'n Crafty Cockney, woa dat 'n nu en toune speelde. In 1988 mucht 'n voun 'n êeste kêe mei met de selecsje van zyn County en loater da joar wos 't Bristow die nem 10 000 pound lêende voun professioneel te kunn begunn. E won da joar oek zyn êeste grôot toernôoi, de Open van Canada.
Carrière byn de BDO
[bewerkn | brontekst bewerken]Ne kuste voun 'n êeste kêe meidoen an 't weireldkampioenschap in 1990 en ne rochte van 'n êeste kêe in de finalle deur Russell Stewart, Dennis Hickling, Ronnie Sharp en Cliff Lazarenko te kloppn. In de finalle moest 'n speeln teegn Eric Bristow, die ol 5 kirs weireldkampioen ewist wos. E klopte Bristow me 6-1 en won ezô zyn êeste weireldkampioenschap. Da joar won 'n nog 8 toernôoin, woarounder de Winmau World Masters, achter 't weireldkampioenschap 't grotste toernôoi van de weireld. 't Joar doarup wos miender goed en Taylor verlôor in de kwartfinalles van 't weireldkampioenschap teegn Dennis Priestley, die 't toernôoi gienke winn. 't Wos in 1992 dat 'n were weireldkampioen kwame, deur Magnus Carls (Zweedn), Per Skau (Denemarkn), Martin Phillips (Wales) en Mike Gregory te kloppn.
In 1993 smêetn 'n voun de latste kêe byn de BDO (e verlôor in de twidde rounde teegn Kevin Spiolek), want e dêel van de spelers zaatn in me de vermienderde sponserieng en tilleviezjekykers en voundn oek dat de BDO (British Darts Organisation) te weinig dei voun de spelers. Ze begustn doarom met en eign bound, de WDC (World Darts Council). Van de BDO mucht dienn bound gin toernôoin organiseern, dus kwaamn ze ounafhankelik van de BDO, oundermêer Taylor zevve dei doaran mei, juuste lik ol de weireldkampioenn die nog smêetn (ollêne Leighton Rees van Wales dei nie mei omdat 'n nie mir en smêet).
Carriére byn de WDC/PDC
[bewerkn | brontekst bewerken]In 't êeste weireldkampioenschap van de PDC in 1994 verlôor Taylor in de finalle teegn Dennis Priestley, mo doarachter het 'n 't weireldkampioenschap edomineerd deur ollêne nog te verliezn in 2003 (in de finalle teegn John Part uut Canada), 2007 (in de finalle teegn Raymond van Barneveld uut Holland), 2008 (in de kwartfinalle teegn Wayne Mardle, 'n êeste kêe ôois dat 'n nie in de finalle stoeg) en 2011 (in de kwartfinalle teegn Mark Webster).
Nine darters
[bewerkn | brontekst bewerken]Taylor het toet nu toe de mêeste televised nine dart finishes esmeetn (uutsmytn me neegn pyls, me miender ku nie). Zyn êestn smêet 'n in 2002 teegn Chris Mason, up 24 meie 2010 smêet 'n teegn James Wade zest twêe nine darters in êen match.
Êrelyste
[bewerkn | brontekst bewerken]Weireldkampioenschap
[bewerkn | brontekst bewerken]| Joar | Rounde | Teegnstander | Uutslag |
|---|---|---|---|
| 1990 | Winnoare | Eric Bristow (ENG) | 6-1 |
| 1991 | Kwartfinalles | Dennis Priestley (ENG) | 3-4 |
| 1992 | Winnoare | Mike Gregory (ENG) | 6-5 |
| 1993 | Twidde Rounde | Kevin Spiolek (ENG) | 1-3 |
| 1994 | Finalle | Dennis Priestley (ENG) | 1-6 |
| 1995 | Winnoare | Rod Harrington (ENG) | 6-2 |
| 1996 | Winnoare | Dennis Priestley (ENG) | 6-4 |
| 1997 | Winnoare | Dennis Priestley (ENG) | 6-3 |
| 1998 | Winnoare | Dennis Priestley (ENG) | 6-0 |
| 1999 | Winnoare | Peter Manley (ENG) | 6-2 |
| 2000 | Winnoare | Dennis Priestley (ENG) | 7-3 |
| 2001 | Winnoare | John Part (CAN) | 7-0 |
| 2002 | Winnoare | Peter Manley (ENG) | 7-0 |
| 2003 | Finalle | John Part (CAN) | 6-7 |
| 2004 | Winnoare | Kevin Painter (ENG) | 7-6 |
| 2005 | Winnoare | Mark Dudbridge (ENG) | 7-4 |
| 2006 | Winnoare | Peter Manley (ENG) | 7-0 |
| 2007 | Finalle | Raymond van Barneveld (HOL) | 6-7 |
| 2008 | Kwartfinalle | Wayne Mardle (ENG) | 4-5 |
| 2009 | Winnoare | Raymond van Barneveld (HOL) | 7-1 |
| 2010 | Winnoare | Simon Whitlock (AUS) | 7-3 |
| 2011 | Kwartfinalle | Mark Webster (WAL) | 2-5 |
Aar toernôoin
[bewerkn | brontekst bewerken]Taylor het bykan 50 van de grotste toernôoin van de PDC (PDC Premier Events), hierounder stoat er en overzichtje:
- World Matchplay: 11x (1995, 1997, 2000-2004, 2006, 2008-2010)
- World Grand Prix: 9x (1998-2000, 2002, 2003, 2005, 2006, 2008, 2009)
- Grand Slam of Darts: 3x (2007-2009)
- Premier League Darts: 5x (2005-2008, 2010)
- Championship League Darts: 1x (2008)
- Las Vegas Desert Classic: 5x (2002, 2004, 2005, 2008, 2009)
- European Championship: 3x (2008-2010)
- UK Open: 4x (2003, 2005, 2009, 2010 + 4 nine darters)
- US Open/World Series of Darts: 4x (2006-2008, 2010)
- Players Championship Finals: 1x (2009)
Doanaasn het 'n nog e stik of 100 aar toernôoin ewonn.
Toernôoin in België
[bewerkn | brontekst bewerken]- Antwerp Open: 2x (1997, 1998)
- Antwerp Darts Trophy: 1x (2008)
Persôonlik leevn
[bewerkn | brontekst bewerken]Phil Taylor is etrouwd en het 4 kienders. En is oek supporter van Port Vale FC, e ploeg uut Burslem.