Plassndoalevoart

Van Wikipedia
Naar navigatie springen Naar zoeken springen
De Plassndoalevoart by Snoaskerke

De Plassndoalevoart ofte 't Kanoal Plassndoale-Nieuwpôort es 'n kanoal in't nôord'n van West-Vloandern da de verbindienge makt tusschn 't Kanoal Brugge-Ostende by Plassndoale en den Yzer an de Ganzepôot in Nieuwpôort. De voart es 21 kilomèiters lank en eit en brêedte van apeupri 20 mèiters.

De Plassndoalevoart wierd tusschn 1632 en 1640 angeleyd lyk en alternatief vo de verzande zêeverbindienge tusschn Brugge en d'n Nôordzêe deur 't Zwin. Bist den Tachtigjoarign Ôorloge wierd den deurgank van Gent noa de Westerschelde ounmeugelyk gemakt deur de blokkoage van d'Ollanders die ulder boas ad'n gemakt oover Zêeuws-Vloandern. Ezo ad Vloandern gêen deftige verbindienge mêe mè de zêe. Ostende wierd ton nor vôorn geschoovn lyk den belangrykstn hoavn. Doamee wierd 't kanoal Brugge-Ostende angeleyd med en sas in Plassndoale. Mor ip't latste gedêelte tusschn Ostende en Plassndoale ad'n ze vrêe vele last van de getyd'n van de zêe. Doardeure ad'n ze nôod an e voarroute die nie g'affecteerd wierd deur de getyd'n, eevnwydig an de kust richtienge Nieuwpôort, Veurne en ezo vodder tout in Duunkerke via 't Kanoal Nieuwpôort-Duunkerke. De Plassndoalevoart lôopt vor en dêel in de vroegere beddienge van den Yperlee.

Hêedn ten doage es de Plassndoalevoart mo van letter commerciëlle beteekenisse niemêe. Olangsn den noordelyke kan es't g'asfalteerde en vo 't grôotste stik ottovrye joagpad erkend lyk internationoale veloroute. 't Sluuzecomplex in Plassndoale es ôok beschermd; D'êeste sluusdeure mo je der nog me d'and bedien'n.