Priverno

Van Wikipedia
Naar navigatie springen Naar zoeken springen
Itoalië Priverno
Coats of arms of None.svg
Map of comune of Priverno (province of Latina, region Lazio, Italy).svg
Priverno binn'n de provinsje Latina
Regio Lazio
Provinsje Latina
Coördinoatn 41°28′NB 13°11′OL
Ippervlak 56,98 km²
Inweuners

Bevolkiengsdichtheid

14.367 (2018)
252,14 inw./km²
Postcode 04015
Website Officieeln site van Priverno


Priverno es en Italioansche gemêente in de provinsje Latina in de regio Lazio. Tout 1927 noemdigde de plekke Piperno.

Zicht ip de boovnstad van Priverno vanip de Serre di Roccasecca

Liggienge[bewerkn | brontekst bewerken]

Priverno grenst an de gemêentn Maenza, Pontinia, Prossedi, Roccagorga, Roccasecca dei Volsci, Sezze en Sonnino. By Priverno ôorn ôok nog de gehuchtn/wykn (frazioni) Boschetto, Casale (Macale), Case Alloggio Ferrovieri, Ceriara, Colle Rotondo, Colle San Pietro, Colle Sughereto, Caciara, Fascia, Fornillo, Fossanova, Gricilli, Le Crete, Mezzagosto, Montalcide, Osteria dei Pignatari, Perazzette, Pruneto, San Martino, Stazione Fossanova en Stradone Grotte.

Priverno ligt tusschn de Monti Lepini en de Monti Ausoni, die olletwêe dêel uutmoakn van de Latynsche Anti-Oapenynn'n. De frazioni o de zuudkantn van de gemêente lôopn mêer bergofwoarts richtienge de Agro Pontino (ofte de Pontynsche vlakte).

Geschiedenisse[bewerkn | brontekst bewerken]

De plekke noemde in d'Oudeyd Privernum in't Latyn. Livius beschryft et lyk e welvoar'nd stadje van de Volskn (ofte de Volsci in't Latyn), êen van de verschilligte Itoalische stammn'n die in tydde in Lazio lêefdigd'n. 't Wierd in de vierde êeuwe v.C. verooverd en platgesmeetn deur de Romein'n. Loater erleefdigde Privernum ipnieuw ounder de Romein'n, ounder and're deurda de Via Appia (de heirboane die liep van Rome noa 't zuudn tout in Brindisi) nie verre dervan o de zuudkantn passeerde. Achter 't valln van't West-Romeynsche Ryk verdween 't stadje were, verzekers deurda't wierd ofgebrookn deur de Moorn.

In 760 wierd deur de kerke ier 't bisdom van Piperno ip pôotn gezet. Van 1217 zat 't bisdom in en personele unie mè 't bisdom Terracina tout 1986 ton da 't ollemoale wierd tôopegesmeetn in't uudige bisdom Latina–Terracina–Sezze–Priverno.

Tout 1870 lag 't stadje binn'n de Pauselyke Stoatn totda 't tôope mè de reste van Lazio by 't êengemakte Itoalië wierd gevoegd.

Beziensweirdigeedn[bewerkn | brontekst bewerken]

  • O de zuudkantn van Priverno ligt de gekende cisterciënzer abdeye van Fossanova, woa Thomas van Aquino (die ôok d'n patrôonillign van Priverno es) gestorvn es ip 7 moarte 1274.
  • In Priverno zyn der ôok teffrente schôone kerkn:
    • De Santa Maria Annunziata-bazilieke es de vroegere katheedroale van Priverno en es nu e zogenoemde co-katheedroale van't bisdom Latina–Terracina–Sezze–Priverno. Ze wierd ingeweyd deur paus Lucius II in 1183. Binn'n de kerke angt e panêel van de Madonna d'Agosto en ku je ôok de scheedel van Thomas van Aquino vind'n.
    • De Chiesa di San Benedetto es gebouwd deur de Benedictyn'n in de zeev'nde êeuwe. Binn'n ku je der fresco's uut de dertiende en zestiende êeuwe zien.
    • De Chiesa di San Giovanni Evangelista es ôorsprounkelyk van de neegnde êeuwe, mo wierd erbouwd in de dertiende êeuwe. Ier zyn der ôok fresco's uut de dertiende tout de vuuftiende êeuwe.
    • De Chiesa di San Tommaso d'Aquino uut de dertiende êeuwe makte in tydde dêel uut van e dominicoaneklôoster
    • De Chiesa di San Nicola uut de dertiende êeuwe
  • De Villa Gallio, wa 't verbluuf wos van kardinoal Bartolomeo Gallio,
  • 't Palazzo Communale uut de dertiende êeuwe mè en fonteyne mè dolfyn'n gemakt deur Giuseppe Olivieri
  • De Porta San Marco en de Porta Posterola zyn d'êenigste van d'ôorsprounkelyk zeevn stadpôortn van Priverno die nu nog rechtestoan.
  • De ruïn'n van't antieke Privernum liggn buutn 't center mè restantn van de meurn, therm'n, e tempel en drie uuzn van de rykke burgereye. Ier en ze an't ende van d'achttiende êeuwe ôok e stif grôo bêeld van keyzer Tiberius gevound'n wa je nu kunt bezien in't Vaticoans Museum.
Wikimedia Commons