Resomoatie
Resomoatie of resomoasje is e procedé woaby dat e lyk ipgelost wordt in e miengsel van 300 toet 400 liter woater en kaliumhydroxide, e sôorte van zeur.
't Miengsel wordt in nen inoxen container ipgewarmd toet 180 groadn en achter drie eurn is 't lyk hêlegans ipgelost. Der bluuft allêne mor e bitje groen-bruun gekleurde vloeistoffe over (die aminozeurn, peptiedn, sukers en zout bevat) en zochte, poreuze witte restn van bêenders (calciumfosfoat), gemakkelik met d'hand te verpulvern, moa mêestal wordt er doa wel e cremulateur vôorn gebruukt. De witte assche kan verstrôoid wordn of bygezet in e columbarium. De vloeistoffe kan were gerecycleerd wordn in 't ecosystème.
De resomateur is een uutviendienge van e Schot en 't zou vele beter vo 't milieu zyn of cremoasje, woaby dat er styf vele CO2 vrykomt.
In verschillige landn is ter vele interesse vo 't resomeern, moa den tekniek wordt vo 't moment allêne moa toegepast in e klinieke in Californië vo orgoann en ledemoatn ip te lossn die weggepakt zyn. In Canada goan ze der in 't korte mee begunn. In Vloandern wordt er ook al over geklapt moar êest moe minister Geert Bourgeois zyn toeloatienge geevn.
Een andere nieuwe methode vo lykn te loatn vergoan is cryomoatie of vriesdroogn.