Seine

De Seine es e riviere van 776 kilomèiters lank die van't midd'n van Vrankryk noa 't nôordwestn strôomt tout in't Iengels Kanoal. De Seine lôopt deur de regio's Bourgogne-Franche-Comté ('t departement Côte-d'Or), Grand Est ('t departement Aube), Île-de-France (de departementn Seine-et-Marne, Essonne, Val-de-Marne, Parys, Hauts-de-Seine en Yvelines) en Normandië (de departementn Eure en Seine-Maritime).

Brounne

De broun'n van de Seine lign o de westkantn van't Plateau van Langres, by de plekke Source-Seine o de nôordwestn van Dijon, ip 'n ôogte van apeupri 470 mèiters. De brounn'n zyn sedert 1864 eigndom van 't stee Parys. By de belangrykste dervan en ze 't joar derachter e kunstmoatige grotte gebouwd en ôok e bêeld gezet van e nimfe die de riviere moe vôorstell'n. Oundertusschn kykt 't stee Parys der nie ol te vet mêer noar omme, en es't wa verwoarlôosd.

In d'Oudeyd, in tydde van de Galliërs, wos ier en illigdom wa ze wel voaker iprichtn ip plekk'n woa da't woater uut de ground komt mè da ze da lyk iet mysterieus bezoagn. De godinne van de Seine noemdigd'n ze Sequana (wa loatr by de Romein'n ôok de Latynsche noame wierd van de riviere). Ze peid'n da 't woater van de brounne teffrente ziekt'n koestn geneez'n. Vandoar da ze vanolles offerd'n by de bronne, vele van die vôorwerpn ein ze loatr ipgegroavn en kun je nu bezichtign in't archeologisch museum van Dijon.

Verlôop

Je kunt 't verlôop van de Seine indêeln in vuuf stikk'n:

La Petite Seine ofte "de klêene Seine" es't stik van de bronne tout Montereau-Fault-Yonne
La Haute Seine ofte "d'ôoge Seine" van Montereau-Fault-Yonne tout Parys
La Traversée de Paris ofte "de deurtocht deur Parys"
La Basse Seine ofte "de lêege Seine" van Paris tout Rouen
La Seine maritime ofte "de zêe-Seine" van Rouen tout oar moundienge. Ip't latste vormt de Seine e lank estuoarium en moundt ze uut in't Iengels Kanoal tusschn de stee'n Honfleur en Le Havre.

De belangrykste zyrivier'n van de Seine zyn d'Aube (248 km), de Yonne (293 km), de Loing (166 km), d'Essonne (90 km), d'Orge (50 km), de Yerres (93,5 km), de Marne (525 km), d'Oise (302 km), d'Epte (100 km), d'Andelle (54 km) en d'Eure (225 km).

Ofbeeldiengn die ier by passn ku je vien in de categorie Seine River van Wikimedia Commons.