Sint-Nikloajkerke (Mêesn)

De Sint-Nikloajkerke (Nederlands: Sint-Niklaaskerk) is d'ênigste kerke van Mêesn. Ze volt, van in de wyde omtrek, op deur neurn top in de vorme van e koepel. Doarom is neur bynoame 'n Dikkop .

Geschiedenisse

D'ôorsprounkelyke kerke bestoeg ol sedert 1057. Ounder de kerke legt er e romaanse crypte uut diezelfsn 11stn êeuw. Die crypte is 't ênigste beschermde monument (sedert 1939) va Mêesn. In de crypte legt er ouk e grafstêen ter êre van Adela van Mêesn.
In 'n Êestn Weireldôorlog wos de crypte een oofdkwartier van de Duutsche. Tusschen december 1914 en februoari 1915 wos Adolf Hitler, toene nog korporoal, in de Betlehem'oeve gekazerneerd, nie verre van de Sint-Nikloajkerke. Hitler ad e schilderytje van de ruïnes van de kerke gemakt; 't angt een kopie van da schilderytje in 't geschiedkundig museum van Mêesn.
De kerke, lyk of da ze d'r nu uutziet, bestoat sedert 1928. Ze wos hêle eropgebouwd, want ze wos in 'n Êestn Weireldôorlog hêlegansn kapot geschootn.

Interieur

In 'n tôorn van de kerke is 't er e beioard me mêer of 50 klokkn. Die beioard wos e joarenlank initiatief van e Mêesnoare, Albert Ghekiere, die overol te weireld op zoek gienk achter geld om de beioard te fienanciern. Êen van de klokkn wos ingezegend deur paus Johannes Paulus II by ze bezoek an Ieper in 1985. Ieder kart speelt de beioard e liedje van êen van de landn die meidein an 'n Êestn Weireldôorlog.
In de kerk zelve angt er e geelkopern luuster by 'n inkom. Die luuster is gemakt deur Otto Meyer, e katholiekn Duutschn soldoat uut 'n Êestn Weireldôorlog die dankboar wos dattn de Twidde slag om Mêesn overleefd adde.