Slag by Duunkerke (1658)

Van Wikipedia
La Bataille des Dunes deur Charles-Philippe Larivière

De Slag by Duunkerke, die ôok wel de Slag der Duun'n wordt genoemd, wierd uutgevochtn ip 14 juni 1658 en wos e beslissende oovrwinnienge van e coaliesje tusschn de Franschn en d'Ingelschn teegn 't Spoansche leegr van de Zuudelyke Nederlandn, dat toen Spoans gebied wos. De veldslag koaderde in de Frans-Spoansche oorloge die al sins 1635 begonn'n wos as nen noaslêep van den Dertigjoarign Oorlog en ôok in den gelyklôopendn Ingels-Spoansche oorloge die in 1654 begonn'n wos.

An de kant van de Spanjoardn vochtn troepn van de Fransche ipstandeliengn (de Fronde) mee en ôok Ingelsche anangers van d'in balliengschap levende Ingelsche trôonpretendent, de loatere Koarel II van Ingeland, die de republiek van Oliver Cromwell wildn omverrewerpn. Deze kant stound ounder de leydienge van Juan II van Ôostnryk, de landvôogd van de Zuudelyke Nederlandn, en de tydelyk oovrgelôopn Fransche leegrcommandant Lodewyk II de Bourbon, Prins van Condé. Ze beschiktn oovr 8000 infanteristn en 5000 man in de cavalerie.

An den andern kant vochtn de Fransche en d'Ingelsche ounder 't bevel van moarschalk Turenne. Zyder beschiktn oovr 6000 infanteristn en 9000 cavaleristn.

De slag endigde in e vrêe verlies vo Spanje. An de Spoansche kant vieln der 1000 dôo en wierdn der 5000 man gevangngepakt, byst dat er an de kant van de Fransche en d'Ingelsche mo 500 dôo woarn. De Slag by Duunkerke wos dus e beslissend treffn en leydde 't joar derachter, in 1659, tot 't Vredesverdrag van de Pyreneeën woarby Spanje ounder and're e stik van de Zuudelyke Nederlandn (Artesië en stikkn van Henegouwn en Picardië) moeste afstoan an de Fransche keunink Louis XIV.