Spa-Francorchamps

Het Circuit Spa-Francorchamps is de thuusbasis vo de Grand Prix Formule 1 van België, de DTM, de 24 eurn van Spa en de 1000 km van Spa Endurance. Verder wordt er ook nog e Volkswagen club event en de 25 uurn van Spa verreedn. 't Is geleegn in 't middn van d' Ardenn in de provincie Luuk in België, meer bepaald in de gemeente Spa. 't Is een van de meest favoriete circuits onder kenners omda 't e rap parcours is me vele niveauverschil en rappe bochtn.

Wyzigingn an 't circuit

Spa-Francorchamps es nu 7,004 km lang, mo dat is nog mo vanaf 2007. In d'eerste joarn va Spa-Francorchamps wos er 15 km circuit, woarvan dat er een ende stroatcircuit wos. Vanaf 1947 woarn der 21 bochtn over 14,1 km. Vele coureurs vondn da 't e gevoarlik circuit wos en doarom en ze der de meest problematische bochtn uutgesneedn vo de veiligheid. Teegn 1979 wos er nog 6,947 km parcours over, me 17 bochtn. Eigenlyk is er tussn de bochtn Les Combes en Stavelot een shortcut gemakt, met de nieuwe bochtn Bruxelles, Double Gauche, Fagnes en Paul-Frère, die tope de tweede sector vormn. In 1981 en ze were wyzigingn angebrocht deur de 3e sector van deze ki opnieuw veiliger te moakn. 6,968 km lang werd het circuit, mo me 19 bochtn.

Buutn in 1994, toen dat er verandering wos by de latste bocht, en ze die formoatie tot 2003 gebruukt. Utendelyk is de latste bocht veranderd in e moeilykern chicane, die simpelweg Chicane werd genoemd, ofwel Bus Stop Chicane, woardeur het parcours in 2004 8 meter langer is gekommn. Vanaf 2007 is er nietn mi veranderd en zyn ze dus by e circuit gebleevn van 7,004 km, met 20 bochtn. De verplatsing van La Source, de eerste, en van de Chicane, de latste bocht, zorgde vo meer plekke vo de pitlane en e langer recht stik met de start-finishlyne. Noarmoate je verder in de tyd goat, zyn der iedere kêer meer moatreegeln genoomn vo de veiligheid: veranderienge van de chicane, tragere bochtn, mo vooral grote uutloopstrookn in asfalt, wor dat er soms nogal gretig gebruuk van gemakt wordt.

Reputoatie

Spa-Francorchamps is een van de geestigste en tegelyk moeilykste circuits ter weireld. Vooral de bochtn Eau Rouge en Blanchimont zyn lastig omdat de Formule 1-coureurs der vul gas moetn deure goan vo genoeg neerwaartse krachtn te verkrygn. De bocht Eau Rouge es zelfs zo populair dat ie voorkomt in boekn en films, en dat ie vele nagemakt wordt up privécircuits. Vele herkennen zelfs de bocht in de back straight van het Formule 1 circuit van Istanbul Park in Istanbul, wor dat de Turkse GP wordt gereedn. Z'en dien bocht 'Faux Rouge' genoemd, vo der mee te kunn spottn. Faux betekent namelyk 'vals' in 't Frans. Dien bochte wos ontworpn deur bekende circuitmaker Hermann Tilke, die tegenwoordig e bitje olle circuits makt voor de Formule 1.

Recente probleemn

De Grand Prix van België is echter geannuleerd gewist in 2006 deur het failliet goan van de organisator. Ook het aantal sponsors is ferm gedoald sinds 2003, omdat de tabaksreclame overol afgeweezn werd. Begun 2012 is er zelfs onderhandeld om int vervolg de Formule 1-races of te wisseln met e circuit in Frankryk, mo dat idee is ondertussn verworpn.

Ofbeeldiengn die ier by passn ku je vien in de categorie Circuit de Spa-Francorchamps van Wikimedia Commons.