Zoetekoeke

Zoetekoeke

Zoetekoeke, kruudekoeke of painepisse (van 't Fransche Pain d'épices) is e sôorte gebak. Omdat 't gemakt es ip boasis van syrope van brune suker en roggeblomme is 't doenker va kleur. Der is dikkersn ôok sterk smoakende zêem in verwerkt.

De boasiskruud'n die de noame en ôok 't grôotste dêel van de smoake geevn, zyn: kanêle, gembre, kruudnoagel (kreudnoagle en knuffienoagle in ZO WVL) en muscoatnote. Eventueel kant'er nog en klêen bitje corianderzoad, kardemoen, foelie, anys, calissieout en al de sort'n zachte doenkere pepers (Jamaica) by.

't Wordt mêestal in schyvjes vôorgesneed'n en der kunn'n sukerkorrelkes ip gestroaid liggn.

Mêestal vindje zoetekoeke in bakskesvorme moar in fêestelyke sezoenen lyk Kestdag, Nieuwjoare, Valentyng en 't Poasn vindje z'ôok in de vorme van en erte; ideoal vô en amoureuze attensie an je "zoetekoeke".

Qua smoake (en ingrediënten) trekt painepisse straf noa speculoasiekoek'n.

Vele vlêesgerecht'n uut het Midd'n-Ôost'n en Turkye komm'n beter uut me 'n poar schelln krudekoeke d'rin. Probeer moa ne kêe in't Vlams gerecht kenyn met bruun bier, da ol redelyk zoete es, 'n poar schellen painepisse by te doen: ge goat peizen da je in Libanon zit.

De AN-uutdrukkienge "een hart van peperkoek" es nie gebrukt in West-Vloanderen; ier zeggn we: "j'ei 'n erte van koekebrôod" of "j'es koekegoed".

Bekende Vlamsche merken van zoetekoeke zyn Meli en Vondelmolen.