Staduus van Brugge
't Staduus van Brugge is êen van d' oedste staduuzn in de Lêege Landn en is geleegn ip de Burg in Brugge.
Geschiednisse
[bewerkn | brontekst bewerken]Achtr e brand in de Brugsche alletorre in 1280 wierd 't oede ghyselhuus ip de Burg, de tonne nie mi gebruukte groaflikke gevangenisse, de niewe vergoadrplatse van de stadsscheepnn. In 1376 wierd 't ghyselhuus in ipdracht van groave Lodewyk van Male ofgebrookn vo platse te moakn vor 'n echt scepenhuus, da oendr leidienge van mêester-metseloare Jan Roegiers wierd ipgetrokkn en pas in 1421 hêelegans grêed was. 't Brugsche staduus is 't êeste monumentoale loatgôotiesche roaduus van Vloandern en Broabant, e getuuge van d' eekonoomiesche en polletieke bloej van de stad binst de 14ste êewe.
De nateurstêenn vôorgeevl van 't oedste gedêelte, da gedeurnde de 16ste en 17ste êewn verschillnde kêe in zuudlikke richtienge vergrodderd wierd, inspireerde d' asjetiktn van de staduuzn van Brussel, Gent, Leuvn en Oedenoarde en êt de Brugsche burgerlikke arsjietikteure styf beïnvloed. De befoamde Brugsche travee, een geevlnis woarin de boovn mekoar liggnde vèèsters van de verschillnde verdiepn zyn gevat, wierd ier vo den êeste ki toegepast.
Ip de meurdammn stoan beeldn van iestôoriesche fiegeurn oendr versierde baldakynn, die verschillnde kêers verniewd wierdn. Surtoe binst de Fransche Rivoluusje wierdn veele ôorsproenklikke beeldn vernield. E poar ootentieke oendrdêeln van die skuulpteurn zyn te vienn in de verzoamliengn van de Steedlikke Muuzea. De gekantêelde bostweirienge, die de geevl ofwerkt, is versierd mê êrkrtôorntjes. 't Zoadldak wordt verrykt mêt e vostkam en veele dakkapelln. In 1766 wierd de lienkr ingank verplatst, en lik e speeglienge gemakt van de rechschn ingank. Ôorsproenkelik wastn in den êeste travee.
Achtr e brand in 1887 was de binnekant van 't roaduus dr slicht an toe. Tusschn 1895 en 1905 paktn asjetik Louis Delacenserie en kunstenoare Jean-Baptiste Bethune 't tegoare oendr andn. De klêene en fr grôote scheepnzoale ip 't boovnverdiep wierdn tegoare gevoegd, toe tgêen da vandoag de dag bekend stoat lik de 'gôotiesche zoale'. De ryke versierienge van die platse kut ipboksn teegn de dikkoroasje van de vôorgeevl. 't Indrukwekkend dubbel oetn anggewêf wierd gerestoreerd en deuregetrokkn oovr hêel de zoale. 't Gewêf van de twêe ôostlikke traveen is 19ste êews. De gewêfsleutls bevattn meedajongs en vierlobbn mêt ofbeeldingen uut 't Niewe Testament en van profeetn, eevangeliestn en illign. De kroagstêenn, die 't gehêel oendrsteunn, zyn versierd mê teemoatiesche vôorstelliengn van de joargetydn, moandn en nateur-elementn. Ip de wandn wierdn taferêeln uut de Brugsche geschiednisse geschilderd deur kunstnoarz Albrecht De Vriendt. Zjuuste lik de monumentoale proenkschowe zyn da neogôotiesche toevoegiengn. De stêenn oovrewelvienge van d' alle ip 't glykvloersch verdiep, uut 't joar 1766, wierd in dezeifste tyd vervangn deur e iestorizêernde oetn konstruuksje, oendrsteund deur vier kompoziete zuuln die die zoale in twêe beukn verdêeln.
- Gôotiesche Zoale
-
-
-
-
Eksterne koppliengn
[bewerkn | brontekst bewerken]- (nl) Stadhuis Brugge.
|
Ofbeeldiengn die ier by passn ku je vien in de categorie Town hall of Brugge van Wikimedia Commons. |