UNESCO

Van Wikipedia
Ga naar: Begunplekkn, zoeken
Dat artikel es oorsprounkelik geschreevn in 't Noordelik West-Vlams.

Vlagge van den UNESCO.
Logo van den UNESCO.

Den UNESCO of in 't lank Organizoasje van de Verêenigde Noasjes vor Oendrwys, Weetnschap en Kuulteure (Iengels : United Nations Educational, Scientific and Cultural Organization; Fransch : Organisation des Nations unies pour l'éducation, la science et la culture) is e gespisjaliezeerd agentschap van de Verêenigde Noasjes (Iengels : United Nations). Zyn doel is by te droagn toe vreede en villigeid deur 't bevordrn van d' internasjonoale soamnwerkienge ip gebied van ipvoedienge, weetnschap en kuulteure, vo voddr te groakn mêt e weirldwyd oentzag vo rechtvoardigeid, wetgeevienge, en menschrechtn tegoare mê vryeid lik of da 't beschreevn is in 't "Chartre van de Verêenigde Noasjes" [1]. 't Is den ipvolgre van 'n ofdêelienge van de vroegre Volknboend (International Committee on Intellectual Cooperation of Internasjonoal Kommietee vo de Verstandlikke Soamnwerkienge).

Den UNESCO ê 195 lidstoatn [2] en 9 geassosjêerde leedn [3][4] . De mêeste van zyn platslikke kantôorn zyn gegroepeerd per drie of vier landn; der zyn ook nasjonoale en regionoale kantôorn.

Den UNESCO probeert zyn doelstelliengn t' oaln deur vuuf oofd-programmas : ipvoedienge, nateurweetnschappn, moatschapplikke-/mensweetnschappn, kuulteure, en kommuniekoasje/informoasje. Projektn oendresteund deur den UNESCO omvattn programmas vor alfabeetiezeerienge, trèènienge van techniesche voardigeid en lêeroars; internasjonoale weetnschapplikke programmas; de bevordrienge van oenofanklikke meedja en de vryeid van de drukperse; regionoale en kuulturêele geschiedkundige projekn; de bevordrienge van kuultuurêele verscheidneid; vertoaliengn van weirld-lietrateure; internasjonoale soamnwerkiengsoovrêenkomstn vo 't bevillign van 't kuulturêel en nateurlik weirld-erfgoed en vo de menschnrechtn te beschermn, en te probeern de weirldwyde digitoale kloove t' oovrebruggn. Y is ook lid van de United Nations Development Group (Oentwikkliengsgroep van de Verêenigde Noasjes) [5].

De bedoelienge van den UNESCO is "by te droagn toe 't ipbown van vreede, 't uutroejn van d' oarmoe, deurzoame oentwikklienge en interkuultuurêele soamnsproake deur middl van ipvoedienge, weetnschap, kuulteure, kommuniekoasje en informoasje" [6]. Den andacht van d' organiezoasje goat ook by vôorkeure no kwaliteit : ipvoedienge vor iedrêen en leevnslank lêern, ipvangn van niewe moatschapplikke en ethiesche uutdoagiengn, koestern van kuultuurêele verscheideneid, kulteure van vreede en ipbow van e kennisse-moatschappy dankzy informoasje en kommuniekoasje [7].

De brêe doeln en duudlike wenschn van de weirldwyde gemêenschap – lik of da ze beschreevn zyn in d' internasjonoal oovrêengekommn oentwikliengsdoeln, woaroendre de Millennium Development Goals (MDG of Ooentwikkliengsdoeln vo d' êeste Duusd Joar) — zyn de groendslag van ol de plangs en aksjes van den UNESCO.

Wikimedia Commons

Verwyziengn[bewerkn | brontekst bewerken]

<References>

  1. (en) UNESCO history, UNESCO.
  2. D' Algemêene Konferensje van den UNESCO stemde ip 31 oktoobre 2011 "vo Palestine t' anveirdn lik lidstoat". Mo, 't merkt ip da, vo "dat lidmoatschap zoe gevôg ên, Palestina de Groendwet van den UNESCO moe têekn en ratiefieceern". (en) UNESCO " Media Services " General Conference admits Palestine as UNESCO Member State, UNESCO
  3. (en) Member States | United Nations Educational, Scientific and Cultural Organization, UNESCO
  4. (en) The Faroes become associated
  5. (en) United Nations Development Group
  6. (en) Introducing UNESCO, UNESCO
  7. (en) 2007 : UNESCO • General Conference; 34th; Medium-term Strategy, 2008–2013