Vierschansntoernôoi

Het Vierschansntoernôoi es een toernôoi in het Schansspringn. 't Es het belangrykste toernôoi van 't joar, en lik dat de noame zegt goat het deure ip vier verschillende schansn. Het êeste toernôoi ging deure in 1952, en sindsdien es't joarliks gehoudn, olsan round de joarwisselienge.

De vier schansn

Gelyk gezeit springn de schansspringers ip vier schansn, en dat in een periode van oungeveer tien doagn, tussn Kestdag en driekeuniengn. Der zyn twêe schansn in Duutsland, en twêe in Ôostnryk, en de toernee gelyk da ze in 't Duuts zeggn, es een ideoale gelegeneid om voo een bitje sportieve rivaliteit te zorgn tussn die twêe landn.

Oberstdorf (Duutsland): de Schattenbergschanze: êeste schanse, me een K-punt va 137 meiters
Garmisch-Partenkirchen (Duutsland): de Grosse Olympiaschanze, met een K-punt va 115 meiters. Dit es de belangrykste wedstryd van het toernôoi (en dus van het joar). Ie goat oltyd ip 1 januoari deure en es de ênigste schansspringwedstryd die ôok in de landn die traditioneel gin springers ein bekend es. Voo veel minsn stoat ie gelyk me Nieuwjoarsdag, want ie weirdt traditioneel utgezondn achter et concer in Weenn.
Innsbrück (Ôostenryk): Bergiselschanze, K-punt 120 meiters
Bischofshofen (Ôostenryk): Paul-Ausserleitner-Schanze, K-punt 125 meiters

De wedstryd in 2007-2008

De wedstryd ging van de joare deure ip 30 december (Oberstdorf, winnoare Thomas Morgenstern), 1 januoari (Garmisch-Partenkirchen, winnoare Gregor Schlierenzauer) , 4 januoari (Inssbrück, Janne Ahonen), en 6 januoari (Bischofshofen, Janne Ahonen). 't Wos den êeste kêe da ze van de nieuwe Große Olympiaschanze in Garmisch-Partenkirchen sproungn. De wedstryd in Innsbrück koste nie deuregoan en es verplatst gewist noa Bischofshofen ip 5 januoari. 't Es nog nôois gebeurd da et vierschansntoernôoi ip drie in plekke van ip vier schansn deureging. Janne Ahonen eit ôok et eindklassement gewonn, en es mè zyn 5 eindoverwinniengn recordouder.

Puntndêlienge

De wedstrydn van het vierschansntoernôoi zyn ôok specioal omda de puntendêlienge anders es dan in de andere wedstrydn. De springers springn in 25 koppelkes en moakn ounderêen ut wie dat er noo de finallerounde mag. De beste vuuf verliezers weirdn ôok ipgevist en zo koomn we tot dertig dêelnemers in de twêede rounde.

Recente winnoars

Noast de winnoare per schanse, es't er ôok een regelmoatigheidscriterium. 'Deen die de mêeste puntn g'oald eit over de vier schansn tôpe, es eindwinnoare. De latste joarn es het vierschansntoernôoi gewounn deur:

2012: Gregor Schlierenzauer
2011: Thomas Morgenstern
2010: Andreas Kofler
2009: Wolfgang Loitzl
2008: Janne Ahonen
2007: Anders Jacobsen
2006: Janne Ahonen en Jacub Janda, een unicum
2005: Janne Ahonen
2004: Sigurd Pettersen
2003: Janne Ahonen
2002: Sven Hannawald. De ênigste schansspringer die olle viere de wedstrydn koste winn in êen joar. Ie eit er êeuwige roem mee verworvn.
2001: Adam Malysz
2000: Andreas Widhölzl
1999: Janne Ahonen
1998: Kazuyoshi Funaki
1997: Primoz Peterka