Zeemarminne

Van Wikipedia
Marminne deur John William Waterhouse, 1905

Een zeemarminne of zeemarmiete (uutsproake marmite) is een weezn dat in de loop van de geschiedenisse in de fantasie van de mens is onstoan. Z’ èt ’t boovnlyf van e vrouwe moar in plekke van beenn è ze e vissesteirt.

Vertelsels over zeemarminn goan styf verre in den tyd. Ze kommn vele voorn in sprooksjes, legendes en in de klassieke mythologie. Doarin wordt er verteld dat antrekkelike weezns alf vrouwe, alf vis met under verleidelike, melodieuze stemme scheepn noa rotsn lokkn vo ze te doen zinkn. In vele legendes zorgn ze vo storm ip zee woadeure da zeemann verdrinkn. Ze kunn ook ziektes geneezn, de toekomst voorspelln en vintn beheksn. Zeemarminn kunn ook verliefd wordn ip e mens moa die affaires loopn over ’t algemeen nie goed of.

Die vertelsels wierdn in de middeleeuwn deur de kerke gebruukt vo menschn te woarschuwn vo ‘t kwoad van de verleidinge. In dien tyd zag je ton ook vele ofbeeldingn van zeemarminn in kerkn, kloosters en kathedroaln. De middeleeuwsche fantasie van marminn met e vissesteirt komt van de vertelsels van zeemann, die peisdn da ze die weezns echt gezien addn. Christoffel Columbus beweirde dat ‘n zeemarminn gezien aad ip zyn reize noar Amerika. Je beschryft ze in zyn dagboek.

Een gekend modern sprooksje is "De Kleine Zeemeermin" van Hans Christian Andersen.

De visscher en de marminne, deur Frederic Leighton, c. 1856–1858