Robertynn

De familie van de Robertynn woarn Frankische edeln die e belangryke rolle speeldn in West-Francië binst de 9ste êeuwe.

Ze zoun ofkomstig gewist zyn uut Haspngouw round Toungern, en ze woarn de vôorouders van de Capetiengers.

Verschillige leedn van de familie han de vôornoame Robert, w.o. Robert van Haspngouw, Robert van Worms, Robert den Sterkn en Robert I van West-Francië.

Ze geraktn verboundn met de Karoliengers, trouwdn in die familie, en ze leverdn zelve ênigte keuniengn, w.o. Odo I, zyn broere Robert I en Hugo Capet, die anzien wordt as de latstn keunienk van West-Francië, den êestn keunienk van Vrankryk en de stichter van de Capetiengers.

Stamboom

• Rodbert
  • Ingelram van Haspngouw
    • Ermengarde van Haspngouw, getrouwd mè Lodewyk den Vroomn
  • Cancor, stichter van d’abdye van Lorsch
  • Landrada
    • Chrodegang, aartsbisschop van Metz, abt in Lorsch
  • Robert van Haspngouw
    • Robert van Worms
      • Robert den Sterkn
        • Odo I, keunienk van West-Francië, getrouwd mè Theodrada
          • Wido
        • Richildis, getrouwd mè Willem I van Périgueux
        • Robert I, keunienk van West-Francië, getrouwd mè Beatrix van Vermandois
          • Emma, getrouwd mè Rudolf I, hertog van Bourgondië en keunienk van West-Francië
          • Adela, getrouwd mè Herbert II van Vermandois
          • Hugo den Grôotn
            • Hugo Capet, getrouwd mè Hedwig, dochter van Hendrik I de Veugeloare
              • Hedwig, getrouwd mè Reinier IV van Henegouwn
              • Robert II
            • Otto van Bourgondië, getrouwd mè Gerberga van Chalon
            • Odo van Bourgondië
            • Beatrix, getrouwd mè Frederik I van Lothariengn
            • Emma, getrouwd mè Richard I van Normandië
            • Herbert, bisschop van Auxerre