Willem van Yper

Uit Wikipedia

Willem van Yper (of Willem van Lo) (ca. 1090 – Lo, 24 januoari 1162 of 1164), was burggroave van Yper en groave van Kent.

Je was ’n ounwettige zeune van Filips van Lo (†1104) en z’n byzit, die van geweun volk ofkomstig was en de dame van Lo genoemd wordt. Filips van Lo, de joungste zeune van Robrecht den Fries, aad e versterkte vestigienge gebouwd in Lo, woa dan ôok de Augustynermonnikn in 1093 under St.-Pietersabdye (1093-1797) bouwdn. De St.-Pieterskerke is nog e stik van die abdye.

Willem trouwde met e dochter van Godfried van Leuven, de zuster van Adelheid van Leuven, die keuniginne van Ingeland was deurda ze getrouwd was me keunink Hendrik I van Ingeland.

[bewerkn] Zyn leevn in Vloandern

Willem probeerde verschillige kêern zyn rechtn ols ipvolger van de groaf van Vloandern ip te eisn, omdat ’n den enigstn overlevenden noakommelink in mannelikke lyne van Robrecht den Fries was, mo dat is em nie gelukt omdat ’n gin wettige zeune was.

• 1119: Boudewyn VII van Vloandern stierf zounder ipvolger. Karel den Goein, die ôok e klêenzeune van Robrecht den Fries was, mo langs moeders kant, volgdeg em ip. De moeder van Boudewyn VII, Clementia van Bourgondië, a pertang vo Willem gevochtn.
• 1127: Karel den Goein stierf zounder ipvolger. Je wierd ipgevolgd deur Willem Clito, de klêenzeune van Willem de Veroveroare en Mathilda van Vloandern, ounder druk van de Franschn keunink Lodewyk VI. Willem van Yper betwistte die keuze deur em mêester te moakn van Veurne, Kassel, Ariën (Aire) en Sint-Winoksbergen (Bergues). Doarip trok Lodewyk VI, tegoare me Gervaas van Praet en Willem Clito, met e gewoapend leger nor Yper. D’Yperliengn lietn under binn langs de stadspôortn en ze kostn Willem gevangn pakkn. Je wierd ipgeslootn in ’t gevang van Rysel.
• 1128: Achter den dôod van Willem Clito probeerde Willem van Yper were groaf van Vloandern te wordn, mo je verlôor van Diederik van den Elzas, die em in 1133 uut Vloandern verbande en z’n bezittiengn ansloeg. Loater krêegt ’n z’n rechtn ip ’t burggroafschap van Yper were.

[bewerkn] Zyn leevn in Ingeland

Verbann uut Vloandern trok Willem no ’t hof van Ingeland en in 1135 wierd ’n kapiteing van e Vlams eurliengnleger binst de burgeroorloge van 1135-1154, in dienst van keunink Stefanus van Ingeland. Willem was z’n rechterand en in 1141 benoemde Stefanus em, vo beweezn dienstn, tout groave van Kent. Willem stichtte doa Boxley Abbey, e Cisterciënzerklôoster (1143-1146).

[bewerkn] Zyn latste joarn

Round 1155 zette keunink Hendrik II em of van z’n titel van groave van Kent en most ’n Ingeland verloatn. Je trok em were in z’n kastêel in Lo, woa dat ’n loater gestorvn is.

In 1770 en ze z’n restn ipgegroavn en erbegroavn in ’t zudelik kôor van de St.-Pieterskerke van Lo. Reks neffest ’t altoar, in de meurnisse, stoat er e kistje met ’t gebêente van Willem van Lo.